熱門話題
毛記電視分獎典禮 誰是最大贏家？
刊登日期: 2016-01-12
琴晚精彩到嘔，又催淚到暈既「毛記電視第一屆十大勁曲金曲分奬典禮」你有冇睇？
即使你冇買飛去現場睇 (其實係撲唔到飛)，或者冇睇到NOW既直播，抑或因為個人原因總之就係冇睇到呢個分奬典禮，我都相信你會知道，今次呢個典禮既贊助商係：Shell 蜆殼。(如果你話你完全唔知，咁你可以唔駛睇下面既字，早抖。)
先講少少背景：毛記電視（英語：TVMost），又稱「毛記」，係一個由香港本地雜誌《100毛》所成立的網絡媒體平台。於2015年5月18日以網絡電視形式開台，內容以惡搞及抽水形式諷刺時弊，同時亦影射當時香港本地兩間免費電視台（無綫電視及亞洲電視）。
毛記今次搞得成呢個分奬典禮，全因為Shell願意贊助佢地，先至成功可以係伊館開Show。呢個分奬典禮係未開始+當晚開show+到節目完左，講得最多既都係#多謝Shell！開Show前已經有唔少人tag #多謝shell，開show 當晚更出現成個伊館既人一齊 #多謝Shell x N次，完show到而家，#多謝shell呢個hashtag更洗晒facebook版，簡直係贊助商之中史無前例既成功。大量人入完油再放相上網#多謝shell,更加係一個正面營銷示範。
試諗下，平時任何大型活動贊助商既list，根本就唔會多睇一眼，又未必會記得，更加唔會有咁多人一齊不停多謝自己，小編深信有人記得其中一個贊助商個名佢地都偷笑緊。再者，成個分奬典禮毛記自己前前後後大大話話都講左勁多次#多謝shell，甚至係用「明張目膽」方式黎植入廣告，大家都毫無介意，依然係笑住黎睇，睇住黎笑，相比起真‧無記要人係攝影機前食炸雞，觀眾接受程度高好多，廣告既成效亦高更多。另一間油公司去贊助真‧無記既頒獎禮，都冇呢個效果，甚至乎可能無人知道係邊間 (Google search 都搵唔到呀陰公)。
話比大家知，#多謝Shell呢個hashtag既Like已經超過數以萬計，係毛記既Post更超過4萬個Like, 獨立多謝shell 既post 都超過5千個Like….可能係Facebook既Like未必直接影響shell既生意額 (不過應該都多左人去左入shell)，但深信呢次既效果對Shell既品牌形象係超出預期。
正所謂萬事起頭難，但其實保持水準keep住落去仲難，想當年Ellen DeGeneres係奧斯卡群星自拍個個都話正，但真‧無記既食炸雞就大家都接受唔到。大家都知道我地呢班廢青要求多多，我地追求要多啲唔同既搞笑新意同創新既惡搞，所以毛記如果要保持成功做大佢可能就要放棄某啲原則，如果唔係就有可能只係做少數市場既王者。
Any肥，其實講咁多，我地一眾既小編都係想
#多謝毛記電視
#多謝咁多位毛毛
#多謝100毛
#多謝Shell
#多謝Now
好多客戶睇到你地今次呢個Good Show同Sponsorship效應，相信對香港嘅 Digital Marketing 行業，將會有所改變。其實有啲野真係睇你肯唔肯勇敢一試，我知道毛記之前搵過好多間Sponsor都係因為好多唔同既原因或唔夠膽做（唔想扯上關係，好似係）而拒絕左，好多人都只係睇間公司有幾大而決定個市場價值，不過經過今次，小編相信呢個市場肯肯定會有所改變。
#多謝你地俾左香港人一個開心既晚上。
文：Yvoone / 圖：互聯網
熱門空缺
