香港打工仔出名工時長，根據政府統計處數據，全港平均每週工時高達44.5小時，當中輪班制員工更常見夜晚10點、11點先收工。收夜之後，最治癒嘅時刻莫過於同同事去食個宵夜，補返啲能量。但問題嚟啦——夜晚食嘢係享受，定係慢性自殺？

好多人話臨瞓前食嘢會肥、會傷身，但日本一項研究就話：適量宵夜反而有益健康。一齊睇下科學點講！

1. 改善睡眠質素
捱餓瞓覺唔止唔舒服，仲會影響血糖穩定。根據《Journal of Clinical Sleep Medicine》研究，低血糖會干擾深層睡眠，令人第二日精神不振。相反，臨瞓前進食少量高纖或高蛋白食物，有助穩定血糖、提升睡眠質素。

2. 幫助新陳代謝
你以為瞓覺就係休息？其實身體仲係努力進行修復同代謝。根據《Nutrition Reviews》期刊，睡前攝取適量蛋白質有助肌肉修復同脂肪代謝，仲可以抑制飢餓荷爾蒙 Ghrelin，減少夜間暴食風險。

3. 真正減肥之道
「8點後唔食嘢」聽落好健康，但其實未必啱晒。根據美國《Obesity》期刊研究，捱餓瞓覺會令身體優先分解蛋白質而非脂肪，長期反而令肌肉流失、脂肪比例上升。適量進食先係減肥關鍵，唔係盲目禁食。

4. 提升工作效率
肚餓瞓唔好，第二日返工自然冇精神。根據《Sleep Health》研究，睡眠不足會令工作效率下降達25%。適量宵夜可以改善情緒、提升專注力，令你第二日返工更有狀態！

小心過量反效果
當然，宵夜唔係任食！如果食太油膩、太重口味，反而會：

• 影響消化，導致胃脹、失眠
• 降低鈣吸收，增加骨質疏鬆風險
• 提升血膽固醇，增加心血管疾病機率
• 誘發酒精性脂肪肝（尤其鍾意「小酌一杯」嘅人）

識食先係王道！
夜晚肚餓唔係罪，識揀、識食、食得健康，宵夜唔止唔邪惡，仲可以幫你瞓得好、做得好、瘦得靚！

推介食物包括：低脂乳酪、香蕉、全麥餅乾、水煮蛋、豆腐、無糖豆漿等。

文：Noelle＠ECjobsonline 編輯部