熱門話題
【職場新鮮人】大學畢業生如何適應職場文化？
刊登日期: 2020-07-02
唔少fresh grad放埋人生最後一個暑假，都要開始搵工或者正式投入職場，但職場同校園始終差天共地，要點做先可以令自己盡快適應和投入職場文化呢？有咩dos and don'ts係需要留意架呢？
大方接受同事邀請
新人新豬肉，通常一入到一間新公司，同事都會出於禮貌，邀請你一齊食lunch或者一齊收工，呢個時候，千祈唔好因為怕dead air就拒絕對方，正因為唔熟，先要接受對方嘅邀請。畢竟喺一間公司裡面，有朋友好過冇朋友。大家間唔中一齊出去食飯，等你唔洗成日摺埋自己之餘，與同事多啲溝通，你都可以藉此了解公司多啲，尤其是公司內部嘅人事，唔問同事，你仲可以問邊個啊？對公司內部有個基本概念，日後先冇咁易行差踏錯啊嘛！
不恥下問
好多新人因為怕麻煩到其他同事，遇到問題都唔敢出聲，最後做錯曬啲嘢，咪又係要同事幫你執手尾。如果你真係怕煩到人，你可以先嘗試自己搵解決方法，到真係覺得搞唔掂，先至將問題集合曬一齊，一次過向人請教，咁樣就算真係麻煩到人，都唔會麻煩到對方咁多次啊嘛！最重要係之後可以避免不必要嘅錯誤，亦能建立你做事積極認真嘅形象。
工作切忌太過搏命
我都明好多大學畢業生，剛剛投入職場，都會好想證明自己，咩都肯捱、肯搏，或者樣樣都想做足100分，但職場係一個好有趣嘅環境，你做得好，大家會覺得係應該；但只要你做錯少少嘢，就會畀人插到你死，再加上你做嘢咁搏、咁賣力，其他人更加會覺得你想搏上位。因此，唔想招人話柄，做嘢但求唔做錯就夠，咁樣喺職場上，都可以避免一啲不必要嘅閒言閒語。而且，做嘢太過搏命，對上司和同事可能都會構成壓力，作為新丁，凡事量力而為就好了。
熟習工作環境
初來報到，你可以多啲周圍行吓，熟習吓公司嘅環境，例如廁所、pantry、會議室、影印室喺邊，你亦可以自備杯、文具、cushion、紙巾等等，為自己營造一個能讓自己感到安心嘅工作環境，咁樣你喺新公司都會覺得冇咁陌生，但千祈唔好一嚟就掛住佈置自己檯頭，放太多嘢喺辦公桌上，唔單止容易令自己工作分心，張檯咁高調，都可能會惹其他同事反感。話明係辦公桌，都係放有關辦工嘅物品好喇！
職場環境變化萬遷、咩人都有，要適應真係唔係咁容易，不過，我相信時間耐咗，每個人都會慢慢搵到一個最適合自己嘅辦公室生存模式，加油！
文：Noelle
熱門空缺
