近排香港滿城風雨，人人對社會議題都有唔同嘅諗法，有人支持，有人反對，喺立場對立嘅情況下，好多時都會引起紛爭同衝突，嗌交都唔緊要，最怕係同公司立場唔同，可能連份工都冇埋！但對於自己認為啱嘅事，無理由為五斗米而折腰架嘛！咁可以點做呢？
 
溫和地表達意見
唔想冇咗份工，唔代表你一定唔可以表態嘅，每個人都有言論自由架嘛！只係你可以溫和啲、理性啲，去表達你嘅認同或不認同，例如其他人/上司話A就唔應該啦……B就太進擊啦……你都可以適當地去反駁：其實都唔一定嘅，A都有點點點，B都有點點點，等其他人知道你嘅立場嘅同時，大家又可以作和平討論，一舉兩得！
 
間接表達立場
有啲人內斂啲，唔習慣或者唔鍾意兜口兜面同人講自己嘅立場，甚至乎可能因為同公司嘅立場唔同，而唔敢出聲。其實又唔洗咁驚青嘅，立場呢啲嘢，本來人人都唔同架啦！如果公司咁都要炒你，只會證明佢好小器囉！不過，既然你唔想明確表態，咪間接或者婉轉啲去表態囉！例如聽日全城罷工，你就同公司請假，或者人哋問你邊日有冇遊行，你話有等等，其實你由頭到尾都冇正式講過自己係支持定反對，但相信公司都會了解到你嘅立場，最重要嘅係，雙方都可以喺唔洗產生口角嘅前提下，明白到大家立場唔同啊嘛！
 
避免討論
講明先，有時刻意唔去觸碰一啲話題，唔係要逃避啲咩，而係有啲議題，包括政治立場、宗教信仰、薪水和婚姻狀況等，都係一啲好私人嘅嘢，如非必要，其實唔洗拎出嚟講，亦都冇需要同人攤牌，說明你嘅立場係咩。如果真係要討論，就一定要夠open-minded，大家一齊撇開個人立場去聽人哋嘅見解，最重要係要尊重其他人嘅意見，唔好得你講冇人講。
 
平心而論，其實同事和上司又唔會同你過人世，雙方立場唔一樣，其實對你都唔會有啲咩影響。唔洗諗點樣可以改變到人哋嘅想法，喺公司只要做好份內事就足夠架喇！唔好同人硬碰硬啊！

文：Noelle