近排香港社會議題滿城風雨，人人都有唔同睇法，有人支持，有人反對。立場對立本來無可厚非，但最怕係同公司立場唔同，甚至影響到份工。打工仔固然要保住生計，但亦唔代表要為五斗米而完全噤聲。咁究竟可以點樣處理？

溫和理性表達
言論自由人人有，但表態方式可以選擇更溫和理性。當同事或上司提出某個觀點時，你可以用「其實唔一定」、「都有另一面睇法」等方式去回應，既能表達立場，又避免正面衝突。咁樣大家可以和平討論，唔會演變成爭吵。

間接婉轉表態
有啲人性格內斂，唔習慣直接講自己立場。其實唔需要過份擔心，立場人人不同，公司若因此而計較，只會顯得小器。你可以用間接方式表態，例如遇到全城罷工時選擇請假，或者被問到遊行日期時簡單回應「有活動」。雖然冇明言支持或反對，但公司大概都會理解你嘅立場，同時避免正面衝突。

避免敏感話題
有啲議題本身就好私人，例如政治立場、宗教信仰、薪金或婚姻狀況。除非必要，其實冇需要攤牌。若真係要討論，就要保持開放心態，尊重其他人意見，唔好只顧自己講。

專注做好本份
平心而論，同事和上司唔會陪你過一世，立場唔同未必真係影響到你。最重要係做好自己份內事，唔好硬碰硬。職場上，專業表現往往比立場更重要。

文：Noelle＠ECjobsonline 編輯部