返工會對著黑人憎嘅客人、同事、老細……就嚟頂唔順啦！成日想怒quit 嘅你不如花啲時間睇下依3點，冷靜翻落嚟先。

當下搵方法應對
如果你每日都幻想怒quit，辭職變成你日常生活嘅一部份，或者你係每日都面對緊一啲推你去極限嘅情況，例如係嚟自老細嘅轟炸式email、嚟自同事或者客戶嘅痴線要求、又或者係啲又長又廢嘅會議。

為咗避免自己唔好突然發火，或者做出一啲自己會後悔嘅事，試下寫低一張list列出你當下可以做嘅嘢同埋可以令自己感覺好啲嘅方法。出去行下、靜思下、去洗個臉、或者打俾個friend呻下——總之學識用其他方法去將你嘅不滿發洩出嚟。冷靜下、暫停想怒quit嘅憤慨情緒等自己睇翻個big picture啦。

幻想未來訪問
即使你有任何冠冕堂皇嘅理由，例如花時間去個旅行都好，係見下一份工嗰陣要解釋點解工與工之間有一大段長時間嘅空白時期都係好難嘅。咁你就可以幻想下當你怒quit之後變咗裸辭，幻想下你係見下一份工嗰陣應該點解釋自己辭職依個舉動啦。如果你嘅解釋可以顯得你有專業嘅態度，咁唔係會好啲咩？

要記住：你需要一份好嘅reference letter先至會得一個好嘅job offer。如果你辭職令到你嘅老細同同事好難做嘅話，佢哋可能就唔會幫你講說話架啦。記住唔好犠牲任何關係，尤其係你想做翻同一行。其實每一行都好細架咋，所以記住唔好搞臭自己個聲譽。或者你會覺得無所謂啦，之後都唔會再見到依啲人、但好多時都係山水有相逢嘅——係同一個行業入面，嗰堆人好容易蒲頭翻出嚟架咋。所以，千祈唔好留低俾任何人攻擊你嘅理由。

化悲憤為力量
返工返到好燥，就係試下學下將依啲悲憤化為力量嘅時候啦。例如有人會突然發覺自己唔想幫人做嘢，所以選擇用閒日夜晚同埋周末假期去發展自己嘅事業啦。尚你做到一定時間，覺得自己盤生意上咗軌道就可以quit咗一直都唔想返嗰份工啦。

要記住：你係可以將工作帶俾你嘅負面情緒化為推動你搵第二個方向嘅動力。專注係你可以控制到嘅嘢上面：好似搵工、花時間係你鍾意嘅人或者係project上面、追尋你嘅興趣同埋工作以外令你開心嘅活動、又或者好似上面咁講發展屬於你自己嘅事業或者係副業。咁樣做唔單止可以好有效咁幫你處理到負面情緒，仲可以幫助你脫離依家嘅不滿情況添架。

當然，一講rage quit，聽落好似好刺激，而且可以即刻終斷令到你唔舒服嘅嘢。但係，你一定要相信你係會係自己嘅職業生涯入面達到成功嘅位置、而且你唔應該因為一份黑人憎嘅工而阻止你自己達到依樣嘢。睇完以上3個方法，停一停、諗一諗啦。

文：特雷弗
讀嘅係心理學，做嘅又係心理學嘅嘢，志願係唔再做心理學嘅嘢。

資料來源：The Muse