夏日炎炎一身「味力」防不勝防

刊登日期: 2018-09-13

家陣又熱又焗，唔使審，公共交通工具例如巴士地鐵，實係重災區，加上返工放工時間迫埋一齊，真係想避都避唔開，陣間仲要見工見客見老細點算好？小編明白，你都唔想熱到臭咗，或者消極地嗅覺疲累，其實唔係無計嘅！

點解汗水會臭
出汗從來唔是問題，唔使怕尷尬喎，30幾度喺條街，人人都會大汗疊細汗好正常，首先我哋要先了解一下出汗變臭嘅成因，再睇下點樣預防，大家都有大汗腺同小汗腺，大汗腺就係啲不見天位置，有蛋白質同埋脂肪酸跟住啲汗排出，油脂積聚喺度惹來細菌，而汗臭味就係細菌發酵出嘅結果，至於小汗腺就直接喺皮膚表面，冇蛋白質同埋脂肪酸，九成九都係排水份，唔好怪錯佢。

合作一下用止汗劑？
止汗劑係有氯化鋁成份，長期用得多有機會刺激皮膚阻塞毛孔，或者本身皮膚比較敏感嘅人類，建議都係一日用一次好啦，用都要用得啱時候，乾身嘅時候先好上止汗劑/噴霧，如果你成身濕唒嘅時候用，跟住產生一啲奇怪味道出嚟，咪話小編冇提住你啊。

顧己及人徹底預防
“You are what you eat” 中醫西醫都會話：你食清淡啲嘅嘢或者食多啲蔬果，例如濕熱體質、食煙飲酒影響下，排汗就有更多雜質，增加異味，總結均衡飲食習慣同埋適時補充水分，都會對你排放出嚟嘅分泌物氣味有正面幫助，男或女、肥人瘦人本無關係，最緊要係注意平時點樣清潔，個人衛生問題，例如方便嘅話帶多件衫出街替換，都係一個唔錯嘅選擇，自己舒服又避免尷尬。

最後，溫馨小提示：香水係遮唔到大量汗味，混合埋一齊之後，信小編，你唔會想聞到。

文：金金