熱門話題
【夏天熱辣辣】醒你7招消暑大法
刊登日期: 2016-06-22
未到7月外面就已經有成30度，出一出去都成身汗，搞到個人都唔想郁又唔想做嘢，想散熱消暑，除了飲多啲水、飲凍野、着背心短褲和留在室內環境這些係人都知的方法，其實仲有很多環保、慳錢又方便的技倆可以幫你降溫，咁喺大熱天時都可以歎一口涼氣啦！
1. 着衫要識揀
夏天出街想冇咁熱，係人都知應該着 T-shirt 短褲就最理想啦 ! 但平日番工，點先可以着得斯文大方又可以快速散熱呢 ? 首先大家可以多着淺色衣物，冇咁吸熱嘅同時，仲可以幫助反射陽光和熱氣 ; 軟身、薄身和鬆身的衫褲，就有助汗水的蒸發 ; OL們多着絲質、蠶絲質地、色丁、麻質或者棉質的裙，仲可以提高透氣度，吸汗吸得勁啲，人都清爽啲！
2. 消暑都要識食
好多人夏天都鐘意飲凍野、食雪糕嚟降溫，但凍飲屬涼性飲料，會影響脾胃的消化功能，雪糕又甜，卡路里又高，其實兩者都不適宜飲用或者食用太多，咁夏天咁熱食咩先至能夠真正消暑 ? 水果方面，西瓜就一定係排第一，佢具有清熱、解渴和利尿的功效，不過西瓜始終是寒涼食品，不適宜食太多 ; 提子、哈密瓜、火龍果、梨、士多啤梨和椰子，同樣水份多，有助清熱、益氣、生津和開胃健脾，亦具有止咳化痰、消除疲勞和抗氧化等功效 ! 蔬菜方面，薄荷、蓮藕、苦瓜、荷葉、蕃茄、綠豆和山楂等，都能夠有助消暑、利尿、生津解渴和增加食欲 ; 飲料方面，飲凍飲雖然真係透心涼，但其實飲溫茶，例如洋甘菊茶、薰衣草茶和玫瑰花茶等更能夠幫助消暑和降溫，茶本身就有減慢新陳代謝的作用，有效舒緩煩悶的心情，而熱飲則能讓毛孔張開，幫助排汗，反而冰水則不利血氣循環，而將黄皮加入薑片和糖煮成水、夏枯草加黑糖、薏仁紅豆水、綠豆湯、冬瓜蛤蜊薑片湯和四神湯等等，都可以是一款消暑又解渴的飲品，鮮榨果汁都是一個不錯的選擇！以後大家就識食啦！
3. 按穴位消暑
按揉合谷穴，即拇指與食指之間的虎口位 ; 內關穴，即手掌朝上，手腕橫紋中間的地方 ; 印堂穴，即雙眉的正中間 ; 中冲穴，即位中指末端的中央處，皆有醒腦明目、疏通脈絡、改善胸悶和清心解熱的作用。另外，由於手腕、腋下和頸部是大動脈和血管聚集的位置，用凍水或者冰袋敷一敷，亦可以起到散熱的功效。
4. 沖涼都有學問
唔少人夏天都會沖凍水涼降下溫，雖然沖凍水涼是有益健康，但沖涼前應先把身上的汗抹乾，待毛孔稍微收縮，再讓凍水慢慢灑在身上，適應水溫之後先開始沖凍水涼。而且，身體發緊熱、出緊汗的時候，就千祈唔好直接沖凍水涼，否則寒氣會順住張開的毛孔進入身體和血管內，容易出現發高燒、暫時性缺氧，甚至中風的症狀。其實夏天沖溫水涼對散熱更加有幫助架 ! 水溫介乎20至30度就perfect喇 !
5. 訓得啱才能消暑
很多人夏天訓覺時都會開冷氣，但其實開成晚冷氣對身體唔好之餘，床上用品揀唔啱，訓極都一樣會覺得熱。寢室用品建議選用竹編、草編、蠶絲、羽毛、棉或者麻等的質料，汗水就更加容易被物料所吸收，有助降低體溫，散熱快就倍感清涼。相反，使用人造纖維的床單和被舖，熱氣則難以散出，容易讓人全身冒汗。另外，當人體進入睡眠狀態時，體溫就會開始下降，加上夏季日長夜短，讓體溫隨住自然環境的溫度而變化，早睡早起，反而會訓得更加好，冇咁容易熱醒。
6. 慢活生活助散熱
而家人人都流行慢活的生活態度，但原來用慢活的節奏食飯、活動和工作，真係能夠有助消暑 ! 食野的時候，由於人體會為了消化營養而產生更多的熱能，導致體溫輕微上升，所以夏天食野時狼吞虎嚥，或者食辣野，就會越食越熱架喇 ! 同樣道理，活動急速會增加體內的熱能，夏天做咩都放慢速度的話，就可以避免身體過熱，以後比人話做野慢得制都有藉口偷懶啦哈哈！
7. 純天然防曬物
唔少女士大熱天時出街或者去海灘玩，都會搽一大堆太陽油防曬又防中暑，但其實坊間本身都有好多純天然的植物可以幫助散熱，蘆薈就係最受歡迎的其中一種。蘆薈有助保濕，塗在皮膚上面可以帶來清涼的感覺，更有消炎、去角質和改善傷痕的功效，對曬傷後的治療十分見效，仲可以預防中暑添 ! 另外，綠茶、肉桂、紅花和菊花等植物對紫外綫都有很强的吸收能力，用嚟整DIY防曬物一流！
參考以上7大夏日消暑秘笈，面對7、8月的酷熱天氣，相信大家都能夠做足消暑措施好好應對啦 ! 以後就算面對30度的高溫，都冇有怕！
文：Noelle So
熱門空缺
