在職場求職過程中，履歷表與求職信往往是你與招聘官的第一個接觸點。它們不單止是一份文件，更是你建立「好印象」的第一步。心理學研究指出，招聘官平均只花 6–8 秒瀏覽履歷表，而求職信則是判斷你是否認真準備的重要依據。因此，想在面試前就贏得好印象，履歷表與求職信絕對不可或缺。

未見官先打八十大板？
有咩人會俾人「未見官先打八十大板」？咪就係求職信同履歷表寫唔好嘅人囉！揾工都唔寫好啲，係人梗係想打發你走啦！唔想未見工就俾人打發 no show，就要留意點樣先叫寫得一手好嘅求職文件。

求職信 Cover Letter
雖然同履歷表同樣重要，但到今時今日仍然有唔少人忽視求職信。求職信俾你一個同公司文字上交談嘅機會。當你 send E-mail 求職時，點都唔會只係得份履歷表嘅 word 檔，然後喺電郵內文打句「hi! bye!」就算啩？

1. 展示熱誠及能力
想人哋請你，一定要俾人睇到你對嗰份工作嘅熱誠同自己有能力勝任。齋打一句「本人對此職位深感興趣，並自覺有能力勝任。」係唔夠。要了解公司背景，講公司有咩吸引你想入去做，仲要用兩至三個相關工作經驗，重點講自己做過咩，咁先夠具體。

2. 用字要謙卑
措辭係最重要。介紹自己經驗同威水史時，要俾人覺得你有實力，但同時唔囂張、易相處。舉例：你曾以活動總監身份籌備大型活動，吸引成千人參加。喺求職信寫「帶領數十名同事合力籌備」，「帶領」展示領導力，「合力」則顯示合作精神，印象分即時加。

履歷表 Resume / CV
履歷表係招聘官最直接了解你背景嘅工具，必須清晰、簡潔。

1. 自我介紹
唔少人只係列出個人資料、工作經驗、技能，但其實可以加一小段自我介紹。簡短描述性格、專長，並指出你能為公司帶來咩貢獻，字數最好控制喺 60 字內。

2. 精簡經驗
只揀同應徵職位相關嘅工作經驗。見文員職位就唔好講自己做過補習，扯唔埋。要突出相關經驗，簡述主要工作內容，令招聘官覺得你有直接經驗，甚至可能因此加分。

面試前的好印象小貼士

• 準備充分：帶齊履歷表與求職信，並預備電子版本。
• 外表整潔：研究顯示，78% HR 認為外表整潔係第一印象最重要因素。
• 態度積極：面試前的每一個細節（如電郵回覆、電話交談）都可能影響印象分。
• 自我介紹練習：首因效應告訴我們，第一句話往往決定成敗。

履歷表與求職信係求職路上的「入場券」，而好印象係打開成功之門的鑰匙。只要準備得當，展現專業與誠懇，你就能避免「未見官先打八十大板」，在面試前已經贏得招聘官的好感，為之後的面試加分。

文：小C＠ECjobsonline 編輯部