現今世代，唔少年青人都渴望追尋夢想，市場上好多商品推廣亦正正捉住呢種心理，令媒體上「追夢」嘅訊息不斷被放大，甚至強化咗新世代對夢想嘅執著。追夢本身無錯，但現實往往令人失望。好多剛畢業嘅年輕人，特別唔係「神科」出身嘅 fresh grad，經歷過狂 send CV 幾個月卻毫無回音，就會深深體會到嗰種挫敗感。

筆者有位朋友，畢業初期只專注申請自己理想嘅職業，但慢慢發現市場上符合佢期望嘅工作非常少。最後佢選擇放寬標準，考慮其他自己覺得「都 OK」嘅崗位。無錯，返工有熱誠固然令生活更充實，但搵工唔可以只靠熱情，否則只會限制自己嘅眼界，錯失更多機會。

美國史丹福大學及耶魯大學心理學家 Paul O'Keefe 的研究亦指出，若只追求「尋找熱情」，視野會變得狹窄，難以鼓勵自己探索新目標。應用到求職上，過份執著於熱誠，反而可能減少發展機會，最終陷入「蘇州過後無艇搭」嘅困境。研究更發現，抱持固執心態嘅人，往往相信自己天生就有固定興趣，但事實上，興趣係隨成長而建立，需要不斷嘗試新事物，先能分辨出真正適合自己嘅方向，並逐步轉化為熱誠。缺乏成長型思維（growth mindset），只會令自己被困於狹窄嘅選擇之中。

O'Keefe 亦提醒，封閉嘅思維模式會令人在求職或職業規劃上變得被動，甚至抱有「等運到」嘅心態，覺得只要有抱負、有熱誠，機會自然會出現。呢種態度容易令人懶惰，唔主動尋找新機會，仲會過份樂觀，以為一旦搵到熱誠，一切就會順利成功。但現實係，當遇到挑戰時，呢類人反而容易失去努力，令自己同目標愈走愈遠。

最終，呢種負面心態唔單止阻礙你搵到理想工作，仲會削弱動力，令人成為消極循環：愈消極，就愈唔願意嘗試新事物，愈難發掘新興趣，愈難成長。

文：Jamie＠ECjobsonline 編輯部