近年，無論係香港、九龍定新界，街頭藝人（Buskers）愈來愈多。由音樂、舞蹈、魔術到行為藝術，街頭表演已逐漸成為城市風景之一。每個週末，旺角、銅鑼灣、尖沙咀甚至赤柱，都可以見到一班年輕人用才華感染途人，吸引唔少市民駐足欣賞。但喺掌聲背後，其實藏住好多不為人知嘅血淚同辛酸。

冷暖自己知：街頭表演唔止係才華，仲係抗逆能力
街頭工作唔似室內舞台，冬天凍到手指僵硬、夏天又熱到出汗，表演者仍然堅持演出。小編曾喺韓國見過Busker手指凍到紫色都繼續彈結他，喺澳洲亦見過觀眾自發打賞、尊重表演者，令人感動。
但香港街頭表演者面對嘅，唔止係天氣。仲有突如其來嘅挑釁：「好閒啫，唱隻歌嚟聽吓！」呢啲說話聽落好似玩笑，但其實係對表演者專業嘅不尊重。你唔會叫醫生「好閒啫，開啲藥嚟食吓」，咁點解對藝術創作就可以咁隨便？

收入不穩：夢想與現實之間的拉鋸
街頭表演唔係即興玩玩咁簡單，背後要花時間練習、籌備、搬運器材，仲要面對冇固定收入嘅壓力。朋友可能會話你「唔使返工，好自由」，但自由背後係不穩定、係孤獨、係堅持。唔少Busker都因為生活壓力而放棄全職表演。有Busker分享，曾經有人聽完佢唱嘅一首歌，決定改變人生方向；亦有人喺街頭求婚，將表演者變成見證幸福的一部分。呢啲時刻，令佢哋覺得一切努力都值得。

合法平台：香港 vs 墨爾本的制度差距
喺墨爾本，只要上政府網站登記，付出約港幣$120，就可以攞到一年有效嘅街頭表演許可證，仲有簡介會教你點樣合法表演。表演區域清晰劃分，唔同類型（音樂、繪畫、舞蹈）都有指定空間，觀眾容易欣賞，表演者亦安心。

反觀香港，雖然有「奏玩樂器許可證」、康文署「開放舞台」、西九文化區「街頭表演計劃」等，但申請繁複、場地有限、人流疏落，仲要面對執法灰色地帶。例如尖沙咀天星碼頭曾貼出「禁止奏玩樂器」告示，旺角亦有表演者被警察抄牌。2018年旺角西洋菜南街行人專用區取消後，Busker失去主要表演空間，甚至有人因表演被控違反土地用途，收到法庭傳票。Busking喺香港，仍然係合法與不合法之間嘅模糊地帶。

Busking 愈來愈多：文化復興還是空間危機？
雖然挑戰重重，但Busking喺香港愈來愈普及。由個人到團體，由即興到策劃，街頭表演已成為年輕人表達自我、連結社群嘅方式。例如「City Echo」就係一個街頭音樂聯盟，推動本土音樂文化，鼓勵表演者互相交流。但Busking愈多，亦帶嚟新問題：噪音、阻街、觀眾過多等情況令部分市民感到困擾。Busker與聽眾之間，亦需要互相尊重與理解，才能令街頭文化健康發展。

堅持的理由：為夢想，為文化
咁多困難，點解仲有人堅持街頭表演？答案好簡單：夢想。每一次表演，都係希望有人欣賞自己嘅創作，希望喺城市中留低一點感動。街頭表演唔止係娛樂，更係香港街頭文化嘅一部分。佢哋係城市中最真實、最有溫度嘅藝術工作者。就好似你每日返工，雖然辛苦，但唔會放棄；Busker都一樣，佢哋用音樂、用汗水、用堅持，為香港注入人文氣息。

文：金金＠ECjobsonline 編輯部