返工日常，除咗做嘢、食飯、去廁所之外，好多時都冇咩特別活動。想抖吓、放鬆吓又唔可以成日行嚟行去，最方便嘅就係打開櫃桶食零食。結果就係：坐得多、少運動、零食食不停，愈食愈肥。咁究竟有咩方法可以醫好「口痕」呢？

1. 轉移視線，保持忙碌
人一閒落嚟就容易想搵嘢食。最直接嘅方法就係令自己保持忙碌，專心做嘢，減少零食時間。好多時候，投入工作後甚至會忘記咗自己想食嘢。如果真係忍唔住，可以食一兩塊餅乾，再配杯水、茶或咖啡，稍為滿足口腹之慾之餘，仲可以提神。

2. 改變用餐時間，少食多餐
想減少嘴饞，可以調整用餐時間，例如早餐延遲到返工後9至10點，午餐12點，晚餐提早到6點半至7點。咁樣可以減少餐與餐之間嘅飢餓感。另一個方法係少食多餐：增加進食次數，但每次食少啲，維持血糖穩定，減少暴食風險。切忌「一餐餓、一餐飽」，咁唔單止傷胃，仲容易引致精神性暴飲暴食。

3. 高蛋白早餐，延長飽足感
蛋白質食物能刺激胃酸分泌，延緩腸胃排空時間，令飽足感更持久。朝早食隻蛋、飲杯奶，午餐加少量肉類或豆類食品，下午就冇咁容易口痕。

4. 下午茶飲品，抑制食慾
下午3至6點血糖下降，人容易攰，亦最容易想食零食。呢個時候，不如沖杯茶或咖啡。咖啡因係天然食慾抑制劑，綠茶亦被證實有助減少飢餓感。蒲公英茶、洋甘草茶、紅茶都係好選擇，甚至可以加少少肉桂粉，效果更佳。

返工悶悶哋，食零食放鬆係人之常情。但要記住，食得開心都要識得節制，唔好畀嘴饞控制你。掌握以上4招，就可以健康咁應付返工口痕，唔怕零食成為肥胖陷阱。

文：Noelle＠ECjobsonline 編輯部