大家平時返工做嘢，通常都係不求做到最好，只求唔好做錯，唔做錯就唔會畀老細鬧，冇畀老細鬧，日子自然風平浪靜，只不過，其實工作上有更多令人感到挫敗、沮喪嘅事，係慘過畀老細鬧！

1. 無朋友
返工返到你無朋友，應該係人生最sad嘅事，無人care你，無人同你食lunch，無人幫你手，甚至乎連你畀人鎖咗喺雜物房，都無人察覺到你唔見咗，真係有咩慘得過畀人當透明人……所以，就算喺office識唔到知心好友，都主動啲埋吓堆，識返幾個比較啱嘴型嘅同事，起碼大家在公在私都可以有個照應啊嘛！有人同自己食lunch都開心啲啦！

2. 做到鍾意嘅工先發現唔適合自己
香港地有幾何可以搵到一份自己真正鍾意嘅工？好多人讀書時期立志要做醫生，做建築師，做wedding planner，要入邊間大機構，邊間大公司，聽落好有志氣，到最後咪可能又係普通打工仔一個。所以，能夠夢想成真，做到一份鍾意嘅工，真係唔容易，但係有咩挫敗得過做做吓先發覺份工原來唔啱自己？或者係原來自己根本無呢方面嘅能力？甚至同自己當初想像嘅唔一樣？最慘係已經努力咗咁耐，依家先想重頭嚟過，一切已經太遲……

3. 愈係想證明自己嘅時候愈係出錯
好多人，尤其是啱啱入職嗰陣，都會想搏取表現，向上司證明自己的能力，每個job都全力以赴，OT成個禮拜都在所不惜！可惜每次都事與願違，愈係想做好個job，就愈係遇到阻濟，甚至畀個客鬧返轉頭，就算你幾有實力都好，喺上司眼中，都變得一文不值了……

4. 工作欠目標
啲文件堆到成座山咁高，日日OT都清唔完，完全無私人時間，同事就個個都側側膊同你講聲「加油」就算，由你自己一個自生自滅，對住成棟file，有時真係唔知咁辛苦為咗啲乜？搏升職？我又唔恨；為咗加人工？正常年尾都有bonus分架啦；搏上司好感？我又唔志在。工作無目標，完全唔知自己做到成隻狗咁係為咗啲乜，一定要講一個原因嘅話，咪就係為咗唔做廢青，唔想餓死街頭囉！

5. 無緣無故被罵/陷害/裁員
Office就係咁唔公平嘅一個地方：你做得好，無人會讚你，只會招人妒忌，搶走你嘅功勞；你一做錯少少嘢，即刻就會有人篤你背脊，出賣你，畀老細鬧完可能你都唔知發生咗咩事；被人跣得多，最後連公司都唔想保你，必要時將你裁走。其實你無錯架！錯就錯在你係一個打工仔，唯有硬啃呢啲挫敗啦！

喺香港打工真係好艱難，日日拚盡條老命，人工都係得雞碎咁多，平時仲要睇老闆面色做人，努力討好啲客，提防身邊啲小人同事。所以話，要論全球最辛苦打工仔，香港人認第二，邊個敢認第一？

文：Noelle＠ECjobsonline 編輯部