日日朝九晚六，坐足八個鐘，食無定時、少運動，腰酸背痛、胃痛、心煩氣燥都係常見症狀。唔好以為「習慣咗就冇事」，長期累積落去隨時變成職業病，後果可大可小。以下幾種最常見嘅上班族職業病，你又中咗幾多？

1. 胃病
食無定時、外食唔健康，容易打亂胃部節奏，出現胃痛、胃氣、胃脹，甚至腸胃炎。預防方法好簡單：三餐定時、均衡飲食，少油少鹽，保持清淡。緊張工作令胃痛更常見，但記住唔好過度依賴胃藥。

2. 腳痛
長時間坐住唔郁，血液循環減慢，可能引致靜脈曲張甚至「經濟艙症候群」。腿部腫脹、疼痛、發熱都係警號。最簡單嘅預防方法就係多走動、多飲水，保持血液暢通。

3. 滑鼠手 / 鍵盤手
日日打字、click mouse，手部肌肉長期疲勞，容易麻痺、抽筋、無力。改善方法包括保持正確坐姿、手腕位置，加托腕或滑鼠墊，定時做握拳、伸展動作，甚至用熱水浸手放鬆肌肉。

4. 視力模糊、臉部僵硬
長時間盯住電腦螢幕，眼乾、視力模糊、面部僵硬都係常見問題。建議保持螢幕距離至少70cm，每用電腦一小時休息10分鐘，多食蔬果補充維生素，記得保濕護膚，減少濃妝。

5. 腰酸背痛
坐姿唔正確、椅子唔合人體工學，容易導致腰背痛甚至脊椎受損。改善方法係定時轉換坐姿、伸展筋骨，保持活動，減少壓力。

6. 焦躁症
職業病唔止生理，心理壓力同樣嚴重。上班族要應付上司、客人、同事同繁重工作，容易焦慮、心浮氣燥。要改善，就要放慢節奏，整理思緒，規劃每日工作，提升效率同心情。

職業病幾乎人人都有，但唔理只會愈積愈嚴重。想返工返得輕鬆自在，就要由今日開始正視問題，改善生活習慣，先可以真正做到「健康打工」。

文：Noelle＠ECjobsonline 編輯部