日日坐喺 office 等放工，唔少人都幻想過提早退休去環遊世界。但現實係，冇錢就冇得飛。不過，原來真係有啲工種係「攞正牌去玩」，唔單止唔辛苦，仲有得收錢。以下 6 種筍工，可能係你夢寐以求的職業轉型方向：

1. Travel blogger：邊做邊玩，仲有得報公數
想散心又唔想請假？做旅遊 KOL 就啱晒。近排著名旅遊 KOL小斯仲豪擲過億買入豪宅，你都咪話唔西利。周圍飛、食好嘢、睇靚景，仲可以體驗唔同文化。好多品牌仲會贊助旅程，包機票住宿，工作＝旅行，真係爽到飛起。

2. 試食專員：收錢食好嘢，消息靈通之選
新開餐廳、打卡美食、街坊推介，你都係第一個試？咁你可能已經係半個試食專員。呢份工專門幫品牌試新菜式、寫食評，唔止免費食，仲有得收錢，食得開心又有收入。

3. YouTuber／作家／Content Creator：生活即內容，歎世界有着數
唔使做明星都可以收錢去玩。有啲 YouTuber／作家會收到品牌邀請，去睇戲、食 buffet、參展、試用產品、玩新 game，返屋企只要出 post、拍片、寫文就搞掂。生活本身就係工作。

4. 動物照顧員：每日抱住毛孩，治癒力滿分
鍾意動物但唔方便養？做動物照顧員就啱晒。陪伴毛孩、餵食、清潔、玩耍，日日都被可愛包圍，工作氣氛超療癒，仲可以學到寵物護理知識。

5. 電影放映員：免費睇戲＋冷氣位＝完美組合
戲飛貴？唔緊要，做放映員就可以免費睇晒最新上映電影。工作期間有冷氣、有得 hea、有得睇戲，港日歐美通通睇到飽，影迷夢想職業。

6. 演唱會帶位員：免費睇 show＋時薪高
每次演唱會請人都好搶手，因為呢份工真係正。唔單止時薪高、時間彈性，仲可以免費睇晒全場演出。唔使撲飛、唔使排隊，近距離睇偶像唱歌跳舞，值晒。

人人都嫌番工辛苦，個個都羨慕其他人可以搵到份筍工，收住錢歎世界。其實世界上邊有免費午餐食？每一份工都有佢嘅辛與酸，不如做好自己本份，嘗試在工作中尋找快樂！

文：Noelle＠ECjobsonline 編輯部