新人第一日返新工，手頭上一大堆新 Workflow、新系統要適應，但最令人頭痕嘅，往往係要重新適應一班素未謀面嘅新同事。

個個性格唔同，邊個玩得、邊個唔激得、邊個最難頂，單靠坐喺位做嘢真係好難短時間摸透。想避開人際大伏、將來合作少啲摩擦？其實唔使幾個月，一餐飯嘅時間就已經夠你睇清楚身邊同事嘅性格密碼！

一、隨和易話為型（順得人意，合作無難度）
飯局特徵：成班同事食飯最怕就係就大家口味——A 唔食海鮮、B 怕辣、C 戒食牛，諗去邊同叫餸嗰個真係頭都大埋。如果有人主動出聲講句：「我冇所謂呀，咩都食得！」，即刻成為全場救星。

職場解讀：順得人意、唔會諸多挑剔。呢類同事喺工作上通常一樣咁好相處，配合度極高，係團隊入面最穩陣、最 Nice 嘅合作夥伴。

二、精打細算型（數字敏感，公事公辦唔做多）
飯局特徵：埋單找數永遠最主動，迅速開機除開每人幾多錢、連幾毫子都計得清清楚楚。

職場解讀：咪以為佢純粹出自好心，其實好可能只係「唔想蝕底」！呢類同事喺工作上通常效率高、條理分明，但同時界線極之分明——絕唔會做多一分毫無好處嘅工作。如果想搵佢幫手，佢可能要計過度過，確認對自己有利或者老細睇到，先至肯應承。

三、挑剔口不對心型（表面冇所謂，實質反駁隊）
飯局特徵：問親都話「冇所謂」，但當你提議食椒鹽鮮魷，佢就話「太肥又高膽固醇」；叫燒味佢又彈「今日啲叉燒唔靚」；想叫個菜煲佢又嫌「食菜唔抵」。

職場解讀：口裏說隨意，實際上最難伺候。呢種同事去到工作開會時往往係「反駁隊隊長」，你話一佢就偏要話二，瘋狂 Ban 晒其他人嘅 Idea 卻又交唔出建設性方案，同佢合作預咗要花大量心力溝通。

四、潔癖強迫症型（細節狂魔，規矩極度嚴謹）
飯局特徵：一坐低就主動幫大家用熱水淥餐具、千叮萬囑要用公筷、食兩啖就搓手液消毒，食完仲要去洗手間漱口先肯行返公司。

職場解讀：對衛生同秩序有極致追求。喺辦公室入面，佢哋對「規矩」同樣有一套嚴格標準（例如位要整齊、文件 Format 要對齊）。同佢哋共事記得注重細節，千祈唔好踩中佢哋嘅隱形界線！

五、是非情報站型（八卦雷達，宜保持安全社交距離）
飯局特徵：食飯時間就係佢嘅資訊發布會，成餐飯雞啄唔斷，由隔籬部門經理八卦講到隔離公司秘聞，消息靈通到好似喺每個人身邊裝咗竊聽器。

職場解讀：呢類同事係雙面刃，雖然可以幫你快速掌握公司內部「水溫」，但危險性極高。同佢食飯聽下笑下就好，切忌向佢傾訴任何私人煩惱或對老細嘅評價，做好自保，避免自己變成下一場飯局嘅主角。

六、源頭減廢型（資源極大化，精明利用福利）
飯局特徵：每次食完飯有剩餸，佢總會神仙過海咁喺袋入面拎個食物盒出嚟包底，話要為環保盡一分力。

職場解讀：懂得「善用資源」，對公司提供嘅福利與物資同樣唔會客氣。平時辦公室嘅文具、A4 紙、以至茶水間嘅茶包零食，佢往往都會物盡其用。同佢合作不妨學習下佢善用資源嘅靈活手段。

放低手機，餐枱就係最好嘅識人場
返工食晏唔好只顧住低頭撳手機！不妨多留意下身邊同事叫餸、找數同傾偈嘅小習慣。摸清各人嘅行事底牌，自然知道日後點樣同唔同性格嘅同事相處，喺職場上走少好多冤枉路！

文：Noelle@ECjobsonline編輯部