日日要應付麻煩客、湊老細、趕proposal，仲要OT到天光，壓力爆棚之下要保持好脾氣真係唔容易。EQ稍低都未必頂得住！咁當同事或客人令你火都嚟埋，點樣先可以快快手冷靜返，投入返工作呢？

1. 化怒火為食量
食嘢係最直接嘅紓壓方法。俾人激到心火盛？即刻開包薯片，咔嚓聲夠治癒，放肆食嘢個感覺仲爽快！再飲杯涼茶降火，心情自然好返好多。公司pantry最好長期備貨，否則同事日日扯火搵零食，20包薯片都唔夠分！

2. 行開洗個面
情緒爆煲或者攰到失控，去洗個面真係有用。凍水可以幫你降溫，令血壓回落，頭腦清醒啲。洗完面再諗，可能會覺得其實冇乜值得嬲嘅事。

3. 將工作重新排序
火遮眼嘅時候，做乜都唔會做好。冷靜落嚟之後，先將工作重新排次序：由簡單或自己喜歡嘅開始，建立完成感，再慢慢處理棘手任務。心態唔同，效率自然提升。

4. 將負面情緒寫出來
唔好將怒火直接發洩喺人身上，影響埋其他人。試吓用文字抒發：寫篇「千字文」記低不滿，好似講咗出嚟咁，舒服晒！但記住唔好畀涉事人睇到，否則就真係麻煩大咗。

5. 反思自己
最重要嘅係自我檢視：究竟咩原因令你咁勞氣？自己有冇做得唔夠好？諗深一層，可能發現唔需要嬲，甚至自己都有不足。反思唔係要責怪自己，而係搵出解決方法，總比坐喺度生悶氣有用。

打工仔每日都會遇到激心激氣嘅事，但嬲完都要繼續搵食。識得用啱方法快速平復心情，先可以保持專注，繼續向前。

文：Noelle＠ECjobsonline 編輯部