今時今日，無論返工定返學，大家都好著重學歷、經驗、獎項、技能同語言能力。總之識得嘅嘢要夠多、夠廣，仲要夠特別！不過，知識唔只係用嚟背出嚟，而係要落地實踐。學術以外嘅範疇同樣重要，尤其係以下幾種軟實力，你又有冇呢？

1. 創意能力
創新年代，創意同想像力就係最大優勢！特別係IT、設計、創作等行業，每年都要有新產品、新idea。好多突破性嘅發明，原來都係由員工天馬行空嘅念頭開始，例如識行樓梯嘅輪椅、會自動消毒嘅扶手。記住，創意唔好收埋，敢於表達，可能就係改善社會嘅一大步！

2. 簡報能力
由細到大學校已經教我哋點樣做簡報：流程清晰、重點突出、內容易明。呢啲技巧一生受用！只要事前準備充足、有吸引嘅開場、講解流暢清楚，就能令聽眾印象深刻，令你嘅present真正發揮影響力。

3. 學習能力
好多打工仔入職時，工作未必同自己讀嘅科有關。冇經驗唔緊要，最緊要肯學！快速掌握工作流程，唔單止幫自己適應公司文化，仲可以減少同事同上司嘅麻煩。肯學、肯適應，就係職場最寶貴嘅能力。

4. 分析能力
社會上資訊繁多，唔可能逐字逐行睇晒。分析能力高嘅人，可以迅速搵到重點，再整理成有用資料。工作效率同分析力息息相關，想快啲完成任務、早啲收工，就要靠呢份能力！

5. 合作能力
團隊合作最怕大家各有各性格，溝通唔到。若果你有良好嘅溝通同協作能力，就能同唔同人都夾得埋，幫組長減少煩惱。分工合作往往能事半功倍，一日完成原本要一星期嘅工作，效率自然大大提升。

小朋友要學識處事、溝通、應變；打工仔亦一樣。返工唔係靠名校背景或者大公司經驗就一定叻，真正令你突圍而出嘅，往往係軟實力。千祈唔好睇少佢哋！

文：Noelle＠ECjobsonline 編輯部