公司想盡辦法去留住人才，增加員工福利是其中一個方法。香港寬頻日前宣布員工假期「升級」，將全薪產假增至16周，等新手媽媽就可以陪BB過百日先返工，而男士侍產假亦由5日增至14日，足足比法定的3日多3倍。

而即將結婚的情侶亦受惠，本身只得長工享有的5日婚假，將擴展至一年以上的合約員工都可享有。一眾未婚員工，現時享受的每個月一日提前下班日，即揀個星期五提早收工兩個鐘，會再「升級」至每個月其中一個星期五返半日，12點半已可收工，令不少打工仔「葡萄」。

除此之外，香港寬頻「俾假」絕不手軟，全部員工放17日銀行假而非勞工假，年假亦有10-23日不等，遠多於法定的7日。另外，仲有1日入職紀念假，1日家庭關顧假、重要節日前夕享受半天假期。仲有最正的是「一換二花紅假」，員工可以選擇用一日人工換兩日假，最多10日。

香港寬頻CEO楊主光認為只要人才開心，就會轉化成公司強勁增長動力，希望今次「加假」可以起到帶頭作用，令更多僱主對員工更好。