香港地除咗藥房多之外，最多就係茶餐廳，開到成巷成市，只要你落街就總會搵到一間喺你身邊。但對於我哋呢啲「無飯家庭」嚟講就係懶人恩物！嗌個碟頭飯就可以當做一餐，仲要有咁多選擇唔駛煩，但你又知唔知平時食開嘅碟頭飯有幾咁唔健康？

一碟可能已經有二茶匙鹽！消委會早前做過一個測試，檢驗咗市面上普遍買到嘅10款較受歡迎碟頭飯，一共100個樣本，睇下佢嘅鈉含量有幾多，結果係多到嚇死人！

 

世衞建議成人每日攝取量鈉含量上限係2,000毫克，而味菜排骨炒麵係十款入面平均鈉含量最高嘅一道菜！佢平均每100克有470毫克鈉！而仲有一款係最高係去到600，唔好以為600咁睇落去好低，一碟飯至少都300克，即係你食一碟味菜排骨炒麵就已經會Over咗你成日嘅上限！

 

被網民喻為「男人的浪漫」嘅枝竹火腩飯竟然係咁多款入面最低鈉！佢每100克有230毫克鈉，根據《食物及藥物（成分組合及標籤）規例》嘅定義，可以視為「低鈉」食品！

 

好多時打工仔無可避免都係要出去食飯，但又想食得健康啲嘅話可以點做？

 

1. 平時可習慣「走汁」，唔好食咁多醬汁！因為走汁可以減剽25-50%嘅鈉含量！

2. 唔好嗌啲醃製食物，好似醃菜、鹹魚、臘腸嘅粉麵飯； 

3. 可以搵人一齊Share碟飯，唔好自己一個人食哂！

4. 或者會用浸下啲餸，令到食物無咁多油鹽。

 

如果長期食太多鈉，好容易會有高血壓慢性疾病！所以大家平時都要留意下自己揀食啲咩嘢啦！

文：阿飛