熱門話題
【打工仔健康】為何深夜總是餓？成日食宵夜好定唔好？
刊登日期: 2021-06-25
香港打工仔出名工時長，有部份採取輪班制，一星期通常有兩、三日都係收夜，10點幾、11點先放工好平常，最好嘅慰勞梗係同班同事去食宵夜啦！有人話咁夜仲食咁多嘢好傷身，但收夜肚餓好難唔食嘢喎！究竟邊邊先啱啊？
好多人話臨瞓前食咁多嘢好邪惡、好肥，日本一項研究就推翻咗呢個說法，食宵夜反而有好處：
改善睡眠
餓住個肚嚟瞓覺，唔單止會造成血糖低，影響睡眠，更會影響隔日的精神狀況；相反，臨瞓前適當進食，能有效穩定血糖，提升睡眠質素。
幫助進行新陳代謝
瞓覺嗰陣，身體仍處於運作當中，並進行新陳代謝，而臨瞓前進食嘅食物，就係其所需要嘅「燃料」，不但有助燃燒脂肪，仲可以抑制飢餓酵素，對減肥和改善身體機能有一定幫助。
強化減肥效果
好多人為了減肥，定下什麼8點之後唔食嘢嘅規則，寧願餓住個肚嚟瞓覺。其實捱餓嗰陣，身體先消耗的是蛋白質而非脂肪，過量的蛋白質消耗，只會令身體的肌肉比例下降，脂肪比例相對上升。因此，適當和適量地進食，先係真正的減肥之道！
提升工作效率
大家捱過肚餓都會明白，肚餓令人很難受，瞓又瞓得唔好，第二日就冇精神和心情返工，工作效率都會降低。所以，適量地進食，可以令到人有返好心情之餘，做嘢都爽手啲，工作效率都會提高。
當然，若臨瞓前大魚大肉，就會好難消化，亦會降低體內的鈣儲存量，誘發青少年近視和中老年骨質疏鬆症，更會提高患尿道結石的機率。夜晚食得太多，亦會增加肝臟合成的血膽固醇，有機會引致動脈硬化和冠心病等疾病。另外，好多人食宵夜時都喜歡小酌一杯，長久下去或會誘發酒精性脂肪肝。
講真，有邊個人係唔為食、唔鍾意食嘢架？夜晚肚餓就更加要食啦！其實只要適量咁食同埋食得健康，宵夜都唔係咁邪惡啫！
文：Noelle
熱門空缺
