求職錦囊
4招令老闆加薪升職有望
刊登日期: 2020-12-28
升職加薪係所有打工仔都渴望嘅野，但要點樣先令老闆覺得你值得多D人工呢？只要你培養到呢四個條件，加薪唔再係遙遠嘅事啦！
成為老闆無可代替嘅員工
公司有咁多同事，要令老闆見到你同其他人唔一樣都唔係容易嘅事。除咗要積極完成每日嘅工作，仲要主動發現其他人睇唔到嘅問題，比其他人更願意解決危機。一般員工可能同老闆有距離感，但係主動發現同解決問題嘅過程中，往往可以建立大家嘅信任，累積到「可以為老闆解決問題」嘅價值。
成為第一個幫公司解困嘅員工
當公司遇到困難嘅時候，好多員工都會袖手旁觀，如果你可以挺身而出，用心用力為公司解困，就算唔知最後結果係點，都可以令老闆感受到你嘅熱誠，令佢覺得你唔只係員工，仲可以係夥伴。其實呢個就係突出你自己嘅好時機，記得好好把握機會啦！
要以大團隊為重
有時候，你嘅付出未必會即時係個人表現上反映出黎，但長期累積落去，其實老闆會注意到員工自發為團隊做嘅事，比起只係著重自己利益嘅員工，已經更勝一籌。所以你應該要跳出個人框框，放大眼光，有咁嘅胸襟，先會令老闆留下好印象。
要主動令老闆睇到你嘅表現
當你具備以上嘅條件之後，就係要令老闆睇得見你嘅表現。多數老闆嘅工作都好繁忙，好難抽時間留意住你所有嘅付出，所以要佢睇得見，唔只淨係倚賴同老闆平時嘅互動，係其他同事同團隊入面嘅評價都好重要。其實係同其他人合作嘅過程中都可以反映出一個員工平時嘅表現，千祈唔好忽略咗呀！
熱門空缺
