熱門話題

5件愈大愈少做嘅事

刊登日期: 2020-09-22

自從出咗嚟做嘢之後,就少咗好多私人時間做自己嘢,weekend都寧願hea喺屋企煲吓劇、瞓吓覺好過。我都明打工仔做足5日真係好辛苦,weekend係應該抖吓嘅,但唔趁放假做吓以下呢啲嘢,我驚你以後冇機會做啊!

睇書
我都知有啲人唔鍾意睇書,一睇書就恰眼瞓,但知識係一世嘅,學多啲嘢,個人都充實啲。當然,你都可以睇一啲你鍾意嘅書:小說、旅遊書、散文、圖文書,內容唔係好學術性都唔緊要,最緊要係建立返閱讀嘅習慣,提高個人嘅文化水平,咁就算hea喺屋企,都hea得有營養啲啊嘛!

同父母食飯/去旅行
好多打工仔要成日OT、輪更,或者放工會有自己節目,都好少返屋企食夜晚飯;就算返去食飯,可能都係各自修行:你有你撳手機;佢有佢睇電視。不如搵一晚,真係認認真真同屋企人出去食餐飯,就算係食快餐都好,大家面對面傾吓偈、講吓笑,重拾吓溫情。如果大家好耐冇一齊去過旅行,又不如下次放長假陪佢哋去外遊?同屋企人去旅行雖然係麻煩啲,但總好過之後父母離開咗,冇得一齊去旅行先嚟後悔啊!

朋友聚會
以前讀書嗰陣,真係三日唔埋兩日就會見班friend一次,同學會都會差唔多幾個月就搞一次。依家個個出曬嚟做嘢,甚至有自己家庭,仲邊得閒約出嚟啊?有都可能係唔知邊個結婚,約出嚟派帖先難得見一次。其實冇時間、怕尷尬、冇聯絡好耐呢啲說法,統統都係藉口嚟架啫!真係有心約嘅話,依家通訊咁發達,又點會約唔到啊?諗吓父母嗰一代,同以前啲朋友冇曬聯絡方法,想搵返以前個best friend都無從入手,你就會明白,自己係幾咁幸福。

去遊樂園瘋狂玩一日
人大咗,思想同行為成熟咗,慢慢失去童真,對於去樂園遊玩,都會變得無感,甚至覺得所有嘢都係假。其實長大同童真唔一定要係對立,邊個話大個咗去樂園玩就係等於幼稚?唔洗理其他人點諗,一於搵日去樂園癲返日,重拾童真,暫時逃離現實,好好抒發吓、放鬆吓。

重拾興趣
個個人都實有一、兩樣嘢拿手或者係有興趣,例如玩樂器、畫畫、摺紙、整陶瓷、跳舞等等,但都因為大個咗、冇時間,就放低咗自己嘅興趣好耐。其實人有一技之長,或者有一樣自己鍾意做嘅活動,係一件好難得嘅事,你更加唔應該放棄。

好耐冇同屋企人正正經經食餐飯?好耐冇揸過本書嚟揭?人大咗,有好多以前成日做嘅事,都冇時間/冇機會再做,但唔通呢啲都係成長嘅錯?係你自己懶咋掛?由今日開始,唔好再懶喇!

文:Noelle


標籤:
朋友聚會
童真
成長
查看全部 熱門話題


你可能感興趣