你有冇試過喺重要會議前完全冇心情見人，覺得自己一啲能量都冇？或者遇到社交場合時，寧願唔出席，想等自己「充好電」先再去？好多內向嘅職場人都經歷過呢啲情況。為咗份工，大家都希望可以同同事交流、拓展人際網絡，但如果一日踩足幾個會議，放工仲要去 happy hour，真係需要大量社交能量。內向嘅人通常靠獨處嚟充電，但又怕唔出席會顯得唔合群，甚至被標籤成「毒L」。咁究竟可以點樣應對呢？醒你以下5招幫你搣甩尷尬，重拾自信。

第一招：事前準備
就好似準備演講一樣，可以先諗定幾個話題，令自己喺場合中有嘢講。出門前同自己 rehearse 一下，將零散嘅想法整理成簡單句子，例如將「我想拓展人際網絡」變成「我想認識多啲同業人士」。咁樣不但顯得自信，仲可以減少臨場思考嘅壓力。

第二招：安排日程
將工作分成需要大量互動同可以獨立完成兩類，然後配合自己能量高低嘅時段去安排。咁樣可以避免喺最攰嘅時候仲要硬撐社交，減輕消耗。

第三招：快速熱身
遇到臨時會議或聚會，冇時間準備話題，可以先同某一個人簡單寒暄，例如講天氣或股市。短短一分鐘已經足夠，幫助自己進入狀態，思路更清晰。

第四招：戴上社交面具
了解自己邊一面最適合社交，然後喺場合中刻意展現。有人靠咖啡，有人靠音樂，有人靠着自己最舒服嘅衫。搵到屬於你嘅「開關」，就能更自在地表現自信。

第五招：享受一日
喺有社交活動嘅日子，安排自己最喜歡嘅活動，令心情充滿正能量。差足電之後再出席場合，自然可以散發自信，俾人好印象。

做齊以上五招，內向嘅人都可以喺社交場合中避免尷尬，擺脫「毒L」形象，展現最有魅力嘅一面。

文：Jamie＠ECjobsonline 編輯部