熱門話題
【被裁危機】5個即將被辭職先兆
刊登日期: 2020-08-07
宜家失業率高企，唔少打工仔手停口停，所以無論做咩工種都好，最緊要係有份長工喺身！無奈世事總係防不勝防，你覺得你份工做得幾好、幾穩陣都好，老闆都係有權炒你。咁點先可以知道自己有冇「被辭職」嘅風險呢？畀人炒之前，總會有啲先兆嘅，有以下呢啲symptom，就要好自為之喇！
1. 負責開嘅project突然畀人抽起
既然你都就嚟無得做！梗係拿拿臨抽起你跟緊嘅project畀其他同事follow啦！交接呢啲嘢，當然係愈快愈好！唔通等你做到九成先叫你唔好做咩？你都唔肯啦！所以，如果你阿頭無啦啦叫你pass返啲job出嚟畀其他人handle，千祈唔好咁開心，以為你上司係唔想你一個人咁辛苦，叫其他同事嚟幫你手，佢咁做只係想叫其他人取代你個位咋！
2. 被分配不可能嘅任務/工作量大減
收大信封之前，你上司一係就會畀一啲好艱鉅嘅任務你負責，等你識得知難而退，做唔到就自動辭職，唔洗搞到大家咁尷尬啊嘛！另一種先兆，就係直程唔畀嘢你做，話曬你都就嚟唔做啦！仲塞嘢畀你做，陣間咪又要搵人接手！所以，各位打工仔覺得啲嘢做唔完係好事嚟架！冇嘢做、日日返到office無所事事先驚啊！
3. 老闆、同事態度大轉變
同老細本來都好哋哋，對方就無啦啦態度180度大轉變，對你變到好冷漠，甚至黑口黑面咁，遇着咁嘅情況，你搵定第二份工都差唔多架喇！同樣，同班同事本身都幾friend，日日都一齊食飯，有傾有講咁，突然有一日佢哋個個都開始疏遠你，對你客客氣氣咁，你就知咩事啦！
4. 有新同事入職
公司又冇人走，又唔等人用，但就無端端請咗個新人返嚟，HR仲交帶佢要跟你學吓嘢？咁你就要小心喇！事關公司可能只係想節省時間，趁早請定個人返嚟，等你一走就可以補上，仲可以趁你仲喺度嗰陣幫手教吓個新人，當係交接工作咁，唔洗之後再花時間搵人湊新同事，一舉兩得！到時收到解僱信，你就真係得個「恨」字喇！
5. 公司無啦啦叫你填好多份表格
離職同入職嗰陣都一樣，有N咁多份表格要填。如果有一日HR失驚無神叫你上去填呢樣填嗰樣，好似好大陣象咁，你就要打醒十二分精神喇！叫你上去填form，極有可能係想你簽好啲離職協議，等佢哋知道你離咗職之後，啲強積金要點供、份糧應該點計、啲假應該點claim做錢等等，簽咗呢啲文件，就同你當初簽合約一樣，一去冇回頭架喇！
畀人炒，好多時唔一定係你嘅錯，可能係公司同人合併、唔需要咁多人手啫！不過，被解僱始終唔係好事，如果你發現有呢啲先兆，而你又想保住份工嘅話，就要出盡200%力去工作，畀個好印象老細，或者都可以令老細改變想法嘅！
文：Noelle
熱門空缺
