近年AI愈來愈勁，唔少打工仔都會用AI幫手砌履歷。不過，根據 Resume Now 最新《2025 AI與求職者報告》，78%招聘經理都話：履歷入面最緊要係人性化內容，唔係堆關鍵字。仲有62%話，如果你份CV係純AI砌出嚟、冇自己改過，好大機會即刻被Reject。

AI幫HR揾人，但請記住：請你入嚟做嘢嘅，始終係人！
IBM早前訪問咗全球8,500位IT人，發現有42%公司已經用AI幫手做招聘流程，例如用關鍵字篩選申請人。但 City CV 行政總裁 McLean 話得好：「即使係科技公司，最後決定請邊個，都係人講事。」
佢話：「我同唔少高層合作過，就算係數據密集型職位，人情味都係決定性因素。你講嘢有冇誠意、有冇熱誠、識唔識講自己點解啱做呢份工，全部都睇得出。」

點樣寫份履歷先唔會俾AI reject，又打動HR？
管理顧問 Obi James 建議：先自己寫，再用AI潤飾。唔好一開始就俾AI砌晒，咁會冇晒你自己嘅tone同特色。
佢話：「你要自己講你嘅價值、成就、理念，然後再用AI幫你check下有冇關鍵字、數據、結構。唔好俾AI搶晒你把聲，因為HR睇嘅唔止係格式，仲係你個人故事。」

千祈唔好用罐頭句！
McLean話，HR最怕就係啲「千篇一律」嘅履歷，例如：

• 「我係一個充滿活力、著重成果嘅人」
• 「我擅長喺快速變化嘅環境工作」
• 「我具備成功嘅經驗」

佢直頭話：「呢啲句HR睇到眼都花，讀完唔知你係邊個，只會即刻跳過。」

AI都會出錯，唔可以盲目相信
James話，佢見過AI亂填空白、改寫成就，結果令求職者履歷出現錯誤，甚至面試時露底。用AI要小心核對，唔好俾佢亂改你嘅職業背景。

最緊要：清晰、有誠意、有故事
McLean最後提醒：履歷唔係堆料，而係講你點樣Fit嗰份工。

• 你帶嚟咩成果？
• 點解重要？
• 你係點做到？
• 你嘅動機係咩？
• 你嘅職業故事有冇連貫？

寫完之後，先再用AI幫你優化結構、加返啲職位描述入面嘅詞，咁先係真正「人機合一」嘅履歷。

總之AI係可以幫助你，但絕對唔可以代替你。HR要睇嘅係你個人特色、誠意同清晰度，唔係一堆罐頭句。想份履歷真係打動人，就要你自己落手落腳，講出你嘅故事。

文：Jamie＠ECjobsonline 編輯部