熱門話題
辦公室戀情最令人老尷的是……
刊登日期: 2020-03-26
所謂日久生情，10對情侶，有一半可能都係喺公司識，話曬都日對夜對，對耐咗，有好感都唔出奇。雖然與同事拍拖有得成日見面，仲可以一齊返、放工，但其實辦公室戀情有好多好令人尷尬嘅地方，真係當事人先至會明！
畀人閒言閒語
人得閒無事就最鍾意傾八卦嘢、食花生架喇！仲要全公司都識你哋兩個，你哋拍拖呢單嘢，仲唔畀人當茶餘飯後嘅話題講到夠？一時講吓個男嘅以前有幾花花公子，一時又講吓個女嘅有幾唔襯個男。最尷尬係有時人哋想討論你另一半，但發現你喺現場又唔好意思繼續講，個氣氛真係尷尬到極點。
畀人擺上檯
公司某程度上都幾似以前返學，邊兩個人拍拖，就一定會畀啲同學仔擺上檯嚟笑嚟講，例如睇到啲咩情侶活動，就會用啲好詭異或者好曖昧嘅眼神望住你哋，再唔係就因為你哋之間少少嘅舉動，就冒曬心心眼咁「Wu……」，真係諗起個畫面都紅都面曬。
難啲一齊請假
唔係同一個部門都好啲，但如果情侶倆係under同一個department，就真係難啲可以一齊拎到假，一、兩日都仲OK，但如何係想請長假去旅行，就真係睇你阿頭好唔好人喇！你知啦！Department無啦啦10幾日冇咗兩個人做嘢，都真係幾頭痕架！
尷尬身份
Touch wood講句，如果你另一半喺公司發生啲咩事，例如被懷疑偷咗人錢，或者洩密，你嘅身份會令到你都一身蟻，其他人可能會覺得你包庇佢，甚至懷疑你都有份！因此，辦公室戀情最淒美又最難捱嘅地方，絕對係有福同享，有難同當！
難有二人世界
雖然大家係做同一間公司，可以有多啲機會見面，但其實二人世界嘅時間，又唔係真係咁多，試諗吓，lunch多數都係成班同事一齊出去食，放工可能又會痴埋一齊走，就算咁好彩全公司得返你哋兩個，是但一個可能都要OT而冇得一齊收工、食飯，全日得個見字，冇交流囉！
易因公事起衝突
平時睇戲都有睇到，兩個老師拍拖，本身幾sweet都好，都好易會因為學生或者校務問題而起衝突；或者係女方職位高級啲，男方都會因為自卑而經常與女方有爭執。可能你會話，你同另一半好少遇到呢啲問題，但如果依家公司同你講，你同你另一半，必須要炒一個人，愛情和麵包，只能揀一樣，你就會發現，辦公室戀情真係唔係咁容易維繫。
咁樣講完，可能你會怕咗辦公室戀情，其實又唔洗咁擔心嘅，兩個人一唔一齊，最緊要係愛唔愛，同適唔適合架啫！又愛又適合嘅話，辦公室戀情又有咩好怕喎？好多人都係由辦公室戀情開始架啦！拍拍吓，咁就一世架喇！
文：Noelle
熱門空缺
