新冠肺炎已經困擾咗港人同全球多時，接近半年來，我哋都係過住戴口罩嘅抗疫日子。最近香港受到第三波疫情嘅突襲，令到港人再次人心惶惶，防疫小幫手又要再次出現返，好似搓手液、除菌掛卡咁⋯
 
有時見到啲人有戴除菌掛卡，心中都會浮起個疑問，「究竟呢啲掛卡係咪真係有用呢？」。而最近消委會就做咗項測試，檢驗咗市面買到嘅14款除菌掛卡掛章產品，睇吓呢啲嘢究竟係咪真係可以抗菌⋯消委會亦提出各疑點，為大家一一解答。
 



1. 殺菌率根本無99.9%！
上圖4（綠淨淨）同14（MIP）都聲稱可以殺菌率高達99.9%，但係經消委會測試後發現兩者都去唔到所講嘅99.9%，只有85.3% 。
 
而圖12（加護靈）同13（Dr. Clo）指只要放一枝除菌筆就可以殺菌99.9%，但係消委會指出2款樣本試驗時需分別要5支及6支樣本才有消毒作用。所以有時呢啲產品都係以自己嘅實驗結果誇大功效。
 
2. 使用限制多
用得呢啲除菌掛卡就係想出街時多個安心，但係有啲樣本嘅標籤說明會建議使用者喺戶外環境用產品，亦都有啲產品係話避免喺潮濕地方、唔好長時間暴露喺陽光下用。
 
好似，5（Nano Virus Buster）、10（Virus Buster）同12（加護靈），呢三樣產品都表明唔建議大家喺戶外用。所以大家唔好相信用呢啲「除菌掛章」就等於百毒不侵，因為啲附近嘅病毒同細菌唔會瞬間消除到！
 
3. 未能證明有效消除病毒
今次測試嘅14款樣本入面，有5款未喺有於限期前向消委會提交產品效能資料，另外9款當中絕大部分未能夠證明有關產品具有短時間內消除特定病毒或減低病毒感染性嘅效能。
 
而且消委會都睇過生產商所提交嘅報告都發現佢哋嘅產品係喺特定嘅環境測驗，當中同現實環境差天共地，所以係咪真係做到聲稱嘅功效有所質疑。
 
4. 化學成份或致小童流眼水
消委會提醒家長，俾子女用「除菌掛卡掛章」產品時要注意安全，因為產品普遍使用嘅有效成份係二氧化氯（chlorine dioxide，ClO2）或者可以產生二氧化氯嘅化合物，有刺激性的氣味。如果濃度較高嘅時候或者會令小童鼻腔、呼吸道、喉嚨和眼睛不適，導致流眼水、咳嗽等反應；如果接觸該化學物質後，沒徹底清潔就拿取食物，將增加誤食化學物質的風險。
 
最後提醒！勤洗手！
消委會雖然指出「除菌掛章」嘅成效不能一概而論，但係適合嘅潔手可以預防到病毒嘅傳播。

文：阿飛