試下搵三個人睇你份CV，你就會有三個角度去睇到有乜嘢應該係份CV上面，有乜嘢應該消失。之但係，唔少人都覺得係CV上面用Objective Statement已經係過時。取而代之嘅，應該係擺一個總結性陳述係上面。或者，因為你點都要將份CV縮到得翻一頁，就直接跳過依啲陳述，只係寫相關嘅工作經驗。咁樣諗都係正常嘅。但係係一個情況之下，你份CV係應該寫翻句Objective Statement：就係你有一個重大嘅職業轉變嗰陣，即係你轉行啊，又或創完業投身翻職場咁樣。

試諗下：假設講緊你有五年嘅創業或者拓展業務嘅經驗，而你依家有興趣去做翻市場推廣嘅話，你份CV可能就未必將你嘅經驗sell到俾個HR睇啦。

係依個情汜下，你好可能會用好好運用一個Objective Statement去清楚解釋你係做緊一個轉變，去展示你嘅技能同經驗點樣配合到依條新嘅職場之路。當你嘅工作經驗係配合唔到你想做嘅行嘅話，如果你唔用Objective Statement寫出你嘅經驗點樣同你嘅職場目標配合到的話，咁就會令到你份CV無咗個方向啦。

即使咁講，你好可能會寫錯個Objective Statement，尤其係當大家都唔重視佢係份CV上面嘅存在嗰陣時。一個例子就係："Objective: To obtain a position as a marketing specialist at a creative and powerful company that deploys my skills and experience"，依啲例子只會嘥咗你份CV嘅位嘅啫。每一間公司都會覺得自己係"creative and powerful"，而且又無列明依個人可以帶到咩"skills and experience"俾公司。你份CV最頭頭嗰個位係豪宅盤嚟嘅，唔應該求其就塞啲嘢入去嘅。

一個好啲嘅方法就係詳細講清楚你嘅目標同埋點解你想將你嘅能力同長處發揮到去你想嘅位上面。例如你可以寫："Objective: To leverage my 10+ years of deal-making experience, customer service skills, and expertise in the advertising industry in a public relations role at a growing marketing startup." 就好似一份總結性陳述咁，佢可以展示你嘅技巧，同時解釋你會點樣將佢哋發揮係個新崗位上面。

即使啲人成日話Objective Statement已死，但同時要知道點樣寫CV係無特定嘅規則嘅。集中係乜嘢可以展示你嘅工作經驗，而唔係乜嘢人人都啱用啦。

資料來源：The Muse
文：特雷弗