有HR話過若果你CV上面有超過三個月嘅空窗期就應該要諗下點樣解釋啦，咁到底應該講咩好呢？不妨學習下以下3點：

保持真誠
無論係咩原因造成個空窗期，職場專家Sharon Armstrong話誠實咁講出嚟就係最好嘅政策。唔好逃避，去解釋。係成個搵工過程，最緊要係保持你嘅誠信，並且展示出嚟。工作易嚟又易走，但係保持真誠，又或者係因為欺暪而臭朵就係一世嘅。咁當然你誠實咁講係好嘅，但都可能因為無準備而口窒窒，令到你講嘅真相聽上去好似即場作出嚟嘅棵篤笑咁，咁所以點解下一個point就係咁重要啦。

做好準備
係你坐低之後開始口窒窒咁講嘢，係同見工遲到或者嗌咗女面試官做先生一樣咁尷尬 。無論你點樣準備好去解說你之前嘅工作同埋職位都好，HR都會問你CV上面嗰個空窗期嘅，所以你最好有心理準備，人哋會問你嗰啲時間點樣用。職場專家Victoria Di Santo就指出，若果你份CV上面有個就過三個月嘅空窗期，你最好就諗下點樣好好解釋啦。

Di Santo指出，唔少人會話佢哋用咗啲時間去湊仔或者去照顧病咗嘅阿爸阿媽。有啲人就會話係申請咗個Long Vacation同埋去旅行，依啲相對成功嘅人係的確需要叉下電嘅。唔少HR都會明白嘅。

當你係照顧緊家庭，又或者係去旅行都好，你都應該有唔少機會係學習到唔少嘅新技能嘅，例如學識點樣去說服人，點樣組織同執嘢，又或者係點樣去適應未知嘅新環境咁樣。認清依啲新技能，諗清楚依啲新技能係可以點樣應用喺份新工上面，然後為嚟緊嘅interviews寫一段簡短而清楚嘅解釋。

Sharon Armstrong就重新指出最緊要保持真誠：係非傳統嘅環境裡面最有可能得到實在嘅新經歷——義工，社會服務或者係照顧家庭都係。尤其係當你可以update著你個行業嘅資訊，又或者係經歷咗啲專業發展。係interview嗰陣講出依啲技能，係可以加強HR對你嘅印象嘅。

保持信心
當然，要你同人討論點解你失業——特別係講點解你被人炒或者遣散——可能會令你覺得唔舒服，但係你唔需要太驚。Di Santo指出，其實CV上面嘅空窗期比你所想像中，仲要常見。Armstrong亦都指出，若果一間公司唔明白經濟下滑會令大部份都失業，亦唔識去體諒依個情況嘅話，你或者都要諗下做唔做依份工啦。
 
或者回答有關失業嘅問題係會令到你唔舒服，但你要知道你唔係孤獨嘅。好好為有可能會嚟嘅質疑做好準備，對你自己係空窗期間學到嘅新技能有信心，並且好好咁展示出嚟，係可以將個空窗期填得滿滿嘅。

文：特雷弗
讀嘅係心理學，做嘅又係心理學嘅嘢，志願係唔再做心理學嘅嘢。

資料來源：The Muse