理想嚟講，一份工應該係具挑戰性，投入感同埋獎勵制度嘅。但係現實又邊有咁完美呢，唔少人返工嘅時候梗會遇到一啲起起跌跌。當你嘅情緒太差，攪到工作表現跌watt嘅時候，你嘅老細可能已經留意到你嘅變化。如果佢無啦啦想見你，仲要求同你單對單見面嗰陣，你有冇諗過應該要講啲咩好呢？直接同佢講自己唔開心？會唔會太怪啊？不如睇下以下3點學下點拆啦。

提供一個解決方法
要同你老細親口講話你翻工唔開心聽落去真係好小學雞，同時又好煩。你唔會想展現你係過份負面，但你又唔想令到你嘅不滿聽落去好似無病呻吟咁。

所以，一個比較好嘅對話方向就係將你關心緊議題配合著解決方法嚟講，而個解決方法係可以令你同你老細都有得益嘅。例如，如果你個lunch hour成日都被team meeting霸佔咗一大部份時間嘅話，你可以同你老細提出將個開會時間調早一個鐘，同埋提下大家記住開會個陣都望下時間。專注係改變情況嘅方法。你老細可能會欣賞你嘅細心，同埋按你所提出嘅方法去作出改變添架。

問佢攞advice
唔太清楚應該點樣解波個問題？唔緊要，你可以利用同老細面談嘅機會去問你老細攞advice。例如，如果你覺得某一位嘅同事把口太臭（可能有爛牙個種）。你可以同老細講下你覺得同佢一齊做嘢好辛苦，而且問下佢有咩解決辦法可以改善到大家之間嘅關係。同你老細講清楚你試過咩方法，去令雙方嘅相處好一啲，但點解都唔work。話俾你老細聽你盡咗力，然後再一齊brainstorm啲ideas。最重要係要令到你老細知道個情況，等佢可以用佢嘅力量去幫你搵出一個解決方法，而唔會令到雙方關係惡法嘅。

尋求協助
依個聽落去好難做到，但就正正係你需要做到嘅，尤其係你唔太清楚可以點樣解決問題嘅時候。俾你老細知道你唔再好似之前咁可以投入工作，而且你需要佢嘅幫手去令到你可以搵翻幹勁。提出一個list，係人哋可以點樣幫你，然之後講下你係個工作環境之中留意到啲咩，又同你嘅角色有咩關係。

記住個討論最好聽落去正面啲，將個對話focus係你可以點樣令到自己改變，而唔係自己嘅負面情緒。你老細可能會欣賞你對工作嘅投入。而且，係個對話入面，佢可能會有啲想法鼓勵到你，然後解決困擾著你嘅情緒問題。

無人會隨時隨地都鍾意自己份工，但如果你長時間都對自己份工無興趣嘅話，咁就可能有啲大問題啦。試下花啲時間認真諗下有啲咩令到你份工唔容易做，但同時都需要反思同埋一個真誠嘅對話，可能你會搵翻起自己想返工個團火。

文：特雷弗
讀嘅係心理學，做嘅又係心理學嘅嘢，志願係唔再做心理學嘅嘢。

資料來源：The Muse