唔講唔知，原來依家啲2000後都已經中學畢業、讀緊大學，以前青春無敵、後生可畏嘅80後、90後，都已經不再年輕，個個都出嚟社會打咗好幾年工，甚至已經結埋婚、生埋仔。其實又洗乜分到咁細？80後、90後同2000後，都係差嗰幾年啫！大家一樣仲有大把quota去玩、去試！一日未到40、50歲，都仲有好多嘢可以放膽去做，千祈唔好等老咗先嚟後悔啊！
 
Working holiday
唔想喺香港日日坐喺office度返工等放工？想去個長期旅行但又怕唔夠錢用？有冇諗過working holiday呢？邊打工邊旅行，一次過滿足曬2個願望！仲可以長期留喺嗰度，暫時逃離香港嘅煩囂，淨化一下心靈，只係有呢個打算嘅話，就要趕快付諸實行喇！畢竟大部份國家申請working holiday都有年齡限制，趁住自己有心有力有青春，就唔好等喇！
 
去一個又遠又長嘅旅行
趁後生仲有心有力有時間，去旅行梗係揀啲偏門啲、有幾遠得幾遠嘅地方啦！仲要一去就去成個月！第時老咗，屋企有老又嫩，除咗未必有時間去咁長時間嘅旅行之外，仲未必有咁嘅腳骨力同精神，話曬去歐洲、美洲呢啲地方，都要坐好耐飛機、揸好耐車，要去真係唔好等老咗退休先嚟去喇！
 
追星
唔係話第時老咗唔追得星，但如果你依家有好鍾意嘅偶像，不妨趁自己仲有呢股熱情，出席多啲活動、去多啲演唱會！當係為自己留個回憶啊嘛！遲啲你就會覺得一把年紀，無謂做埋啲咁癲嘅嘢架喇！要癲就梗係依家癲夠佢啦！更何況，到你老咗，都唔知你個偶像仲會唔會出嚟唱，到佢息咗影、退出咗樂壇，你先嚟追都冇用啦！
 
挑戰一啲平時唔敢做嘅事
平時唔敢玩過山車？從來未玩過衝浪？未試過一個人去唱K？咁就要趁後生試一次喇！唔通等幾10年後，副骨頭就散、隨時心臟病發，先走去玩滑浪飛船咩？而且，後生細仔面皮夠厚，天不怕地不怕，一個人去唱K、打邊爐，唔洗怕其他人嘅目光，老咗應該就冇呢份勇氣喇！
 
追尋夢想
年青就係本錢，唔怕跌低、唔怕失敗，如果你有一啲心願未了、一啲夢想渴望實現，咁就唔好諗咁多喇！一於去馬啦！如果你一直以嚟嘅夢想係做歌手，不如試吓錄啲demo寄去唱片公司，或者參加吓啲歌唱比賽；又例如你一直好想試吓做配音員，一於積極啲報名參加吓啲配音班，當係充實同增值吓自己都好啊！就算最後完成唔到，都叫做嘗試過啊！
 
談一場轟轟烈烈的戀愛
咁講雖然好老套，但如果你係單身，身邊又冇一個適合的對象，何不試吓玩吓交友app，甚至參加吓聯誼或speed dating？當係識吓朋友都好啊！遇到適合嘅，亦不妨多花時間互相了解吓，快開始都唔係一個問題，愛錯咗，咪再嚟過，最重要係唔好收埋自己，凡事主動啲，話唔定有意外收獲。
 
發掘一些新的愛好
放假成日冇嘢好做？淨係攤喺屋企做廢人？不如搵啲新嘅活動！例如學吓寫西洋書法、學一種新嘅語言、學吓整唔同嘅甜品、學識游水等等，為自己發掘一啲新嘅興趣和活動，充實吓自己的生活。而且，人愈大就愈難學一樣新嘅事物，趁住自己吸收能力和記性仲好，就搵多啲嘢嚟學喇！
 
人一生實在有太多事情想要完成，趁住年青尚有本錢，盡情做去自己想做嘅事啦！不好等將來才來後悔！
 
文：Noelle