熱門話題

港式奶茶VS珍珠奶茶 邊款奶茶最肥?

刊登日期: 2019-09-09

近排啲台式飲品店開到成行成市,好多打工仔每日放lunch都會整杯返公司飲,再唔係食早餐或者食下午茶嗰陣都會叫返杯熱/凍奶茶,奶茶好似永遠都離唔開打工仔嘅生活咁,明知佢好肥又多糖,都係會忍唔住飲,唯有睇吓有冇啲冇咁肥仔嘅選擇啦!

港式奶茶
茶餐廳奶茶用最濃嘅茶嚟沖,加埋我嗌少糖/唔落糖,一定最唔肥喇掛?其實又唔係喎!因為絲襪奶茶最致肥嘅唔係糖,而係淡奶,100mL淡奶嘅熱量就已經有成130卡,半杯淡奶嘅脂肪量更相當於2茶匙嘅油。而一杯茶餐廳熱奶茶,熱量就有約150卡,每日飲一杯嘅話,一年內係有機會肥10磅架!

珍珠奶茶
珍奶咁好飲、咁受大家追捧,熱量一定唔少嘢啦!首先,珍珠奶茶多數係由奶精製成,而奶精則係由棕櫚油、椰子油、甘油酯、糖等所製成,油脂含量和熱量都非常高。而大家好鍾意嘅珍珠,一份其實亦相等於一碗飯的熱量!以為嗌微糖就冇咁肥?其實都唔差好遠架咋!一杯全糖珍珠奶茶約為710卡路里,少糖650卡、半糖610卡,微糖570卡,無糖510卡,可見全糖和無糖,都只不過係差200卡。

泰式奶茶
除了日本,港人都十分喜愛到泰國旅遊。去食泰國菜,泰式奶茶都係必點的飲品,咁唔知泰式奶茶又肥唔肥架呢?叫得奶茶,熱量其實都一擔擔架喇!普遍泰式奶茶都係口味偏甜、糖份高,而且係用煉奶調味,煉奶都係出曬名嘅肥仔嘢,一杯泰式奶茶,350 卡走唔甩。

拉茶
台灣有珍奶,泰國有泰奶,馬來西亞和印度就有拉茶,但同樣,拉茶多數係用淡奶或煉奶去沖,煉奶是由大量糖漿所製成,呢種濃縮牛奶不論甜度、飽和脂肪定熱量都比鮮奶高好多!一杯250mL嘅拉茶就有140卡路里,內含超過4茶匙嘅糖,好在大家應該都唔係成日飲到。

英式奶茶
食English breakfast,又點少得一杯English tea呢?但英式奶茶通常都唔會用奶精,只會加入鮮奶和少少砂糖調味而已,感覺就比較健康,一杯平均都係290卡左右。

奶茶落咗咁多奶同糖,梗係好味啦!但好味都要注意脂肪量和糖份,唔好以為一日淨係飲一杯就冇事,積少成多,一年後你唔好後悔啊!

文:Noelle


標籤:
港式奶茶
珍珠奶茶
泰式奶茶
拉茶
卡路里
查看全部 熱門話題