熱門話題
帶父母去旅行最頭痛的5件事
刊登日期: 2019-08-30
適逢暑假，好多人都會一家大細去旅行充吓電，有啲打工仔都會特登帶埋父母一齊，共聚天倫之樂。雖然有得同屋企人去第二度玩，係一件好難得、好開心嘅事，但係唔少人喺去旅行嘅過程中，少不免會對家中嘅長輩有不滿，唔知以下呢啲煩惱，你哋又有冇經歷過呢？
成日要搵地方坐
畢竟老人家腳和腰骨都唔好，行一陣就要搵地方坐吓、休息吓，甚至乎隔一陣間就要去廁所。雖然明白佢哋唔係好行得，但係行一陣街就要搵地方抖，真係少不免會有啲掃興，始終後生仔去旅行梗係想chur盡佢，有幾多景點去幾多景點，shopping、食嘢，都一定要行曬成條街每一間舖頭，無啦啦行咗15分鐘就要停低等啲老人家去廁所，真係幾冇癮嘅。
食嘢有限制
後生一輩去旅行，食嘢梗係冇咁多要求啦！去台灣，夜市污糟啲又有咩所謂？最緊要係好食啫！但係啲長輩就頂唔順喇！間食店「罨耷」啲又嫌邋遢、唔乾淨、唔衞生；去食日本嘢又話生冷嘢唔健康；食泰國嘢又話唔食得辣冇嘢好食，講咁多最後都係想你哋就佢食中菜、白飯。媽啊！去到外國食中國菜、飲早茶？咁去嚟做咩？
咩都唔玩
老人家始終唔受得刺激，去旅行又唔志在玩，你哋帶佢去啲主題樂園度玩機動遊戲，某程度上係浪費咗張飛。佢咩都唔玩唔緊要，只弊你哋又要搵人睇住佢，廢是佢人生路不熟、言語又唔通蕩失路，佢又無聊唔啱玩，你睇住佢又冇得玩，大家去到鬥悶，何必呢？
喜好不同
同成班friend去旅行嘅好處，就係大家年紀相若、喜好差唔多，plan行程就簡單得多：例如成班男仔去旅行，就梗係plan去啲可以買模型、玩機動遊戲嘅地方；女仔就去啲商店街shopping、去咖啡店影靚相等等；同屋企人去旅行，有時愈大就愈唔知可以去邊度好。佢哋鍾意去啲寺廟啊、公園啊睇風景，為咗就佢哋你又悶親自己；倒返轉頭佢哋就你去買figure、買電子產品，佢哋又唔啱睇，你又冇人同你傾，真係好無奈。
影相報告親戚group
同屋企人、親戚去旅行，啲長輩最鍾意就係每去一個地方就要打卡、send相畀人，唔send曬畀所有親戚group、姨媽姑姐group、三姑六婆group、教友group、耍太極group唔願走，最慘係影還影，一影就要影10幾廿張，連垃圾桶、郵箱、噴水池都唔放過，有時仲要拉埋你一齊影。救命啊！影相影一、兩張就夠啦！Send相一日send幾幅就夠啦！唔洗一嘢喺group洗版啊嘛？方死全世界唔知你去咗旅行咁！最慘係我要幫你揸機不但止，你仲轟炸埋我WhatsApp啊！
雖然同父母、老人家去旅行，要照顧佢哋真係幾麻煩，不過念在可以同佢哋去旅行嘅時間唔算多，可能遲多幾年，佢哋已經冇辦法好似依家咁行得走得食得，你就應該好好珍惜可以同佢哋一齊出國嘅時光，為彼此製造美好的回憶！
文：Noelle
熱門空缺
