一年容易又完sem，過埋呢個暑假，唔少準大學畢業生都要開始出嚟做嘢，過打工狗嘅生活。身為社會大學嘅freshmen，唔好以為返工做好自己份內事就夠，仲有好多辦公室潛規則要學定架！

冇人教你
返工唔同返學，唔係坐埋位就會有人行過嚟教你點做嘢，上司和同事大多數時候都只係會交低啲文件畀你handle、略略brief兩句就走人，覺得一頭霧水？係咁架喇！站在公司立場，請你返嚟係想你有貢獻，而唔係畀錢你嚟學嘢！唔識做咪問人囉！冇人答你咪自己慢慢摸索、執生囉！你最後總會完成到份文件嘅，只係可能做得慢啲啫……

做阿四
新人新豬肉，畀同事當阿四，好正常啊！啱啱加入公司，係需要認吓低威、討好吓班同事嘅，間唔時幫大家買吓下午茶、收吓fax、送吓文件，係就係辛苦啲、無謂啲，但試問邊個唔想埋堆啊？辦公室政治係咁架喇！幫手啃吓啲豬頭骨，同事覺得你抵得諗，咪侵埋你玩囉！

被罵不駁嘴
做咗一段時間、有返咁上下經驗，就話有資格駁老細嘴啫！但你只係區區一個新丁，老細講嘢幾無道理都好，你都唔好嘗試反駁啊！畢竟你未過試用期，都要留返個好印象畀人架！不過，畀老細鬧唔一定係佢唔滿意你嘅，可能係咁啱佢心情麻麻，見你係新仔、唔知頭唔知路，咪搵咗你嚟出氣囉！由佢發洩完就冇事架喇！

保持距離
我都明大家去到一個陌生的環境，都會為咗快啲埋到堆，刻意製造話題，吸引其他同事的注意，例如講吓八卦是非、傾吓秘密等等。其實你又唔會一世打死一份工，更何況與同事好難做到真心好友，你又何必拎自己嘅秘密出嚟交換一個圈子呢？講八卦是非就仲衰，班同事你先啱啱識，難不防人哋轉過頭爆返你大鑊、出賣你架？所以，做新人就要識得同其他同事保持適當距離，唔好輕信他人，慢慢了解清楚對方，才考慮做唔做朋友都唔遲啊！

搞清公司文化
每間公司都有佢獨有嘅工作文化和氣氛，透過觀察，你可以知道其他同事嘅工作習慣：開會個run-down係點架呢？平時做嘢通常係要趕deadline定都會早交呢？公司有咩慣有嘅大客？咩部門嘅同事特別難相處？呢啲嘢通常都唔會有人提點你，而係要你自己去留意，留意得到，自然就冇咁容易犯錯、踩地雷啦！

話就話係新人，有藉口去犯錯，但有啲錯，就絕對可以避免嘅。睇完以上5點，希望咁多位職場初哥都可以好快融入到新環境啦！

文：Noelle