熱門話題
職位與期望有出入 留定唔留？
刊登日期: 2019-08-20
暑假就嚟完，好多fresh grad放完人生最後一個暑假、去完個grad trip，都要修心養性搵工。雖然依家好多公司都請緊人，但工又唔係真係咁易搵，有時真係逼不得已要降低自己嘅要求，咩工都apply咗先。喺冇其他更好offer嘅情況下，得份打雜工，又做唔做住先呢？
晉升機會
有時自己想做嗰個post需要工作經驗，但啱啱fresh grad冇條件，可能只係可以做到助理或者office boy呢啲位，咁應唔應該accept呢？如果你覺得有晉升機會，可能做一排公司都會升你職，你可以做到你本身想做嘅職位，咁其實你都唔洗介意要由低做起；但如果晉升機會好微，可能做一年半載你都係做同一個位，咁你都係唔好浪費時間同青春，不如再等一下，可能會有更好、更符合你條件嘅offer出現。
工作內容
Title呢樣嘢好玄妙：有時做助理，但根本就同打雜冇分別；有時做打雜，反而就咩都會掂，可能開會傾idea見客打proposal乜都有份。所以，如果你每日返工都淨係負責影吓印、買吓外賣，咁我都係勸你唔好浪費時間，做啲同你志向相違背嘅工作；相反，如果你嘅工作內容係你本身喜歡做/想做嘅事，咁就算個title衰啲，其實都冇緊要，同上司傾吓，相信對方都會明白，同你轉返個title，或者升你職嘅。
影響CV與否
好多人為咗可以快啲搵到工，咩offer都照哽，但之後寫咗落份CV度，可能就影響你一世架喇！下次搵工嗰陣，面試官一嚟可能會問你點解之前會做啲咁唔同嘅工，例如你之前係做保險，依家又嚟搵有關design嘅工，咁樣可能會畀人一種感覺，就係連你都唔知自己想做咩；二嚟考官可能會覺得你份人冇咩目標，咩工都肯做，明明碩士畢業大把前途，偏偏前一份工就走咗去做reception，令人覺得你冇咩大志。
Follow your heart
其實每一份工都係一個經驗，若你尚年輕，又唔介意由低做起，就算份工未符合你嘅學歷同條件，都可以嘗試吓先，當係累積一個經驗，做一年左右，就搵過第二份，都未嘗唔係一件好事。始終依家好多工都要求要有工作經驗，而工作經驗正正係fresh grad所缺少嘅。所以，依家有offer畀你，只要係你自己想做嘅工作類型，都可以試咗先，之後再轉都冇所謂，反正年青人大把quota！
喺香港，要搵一份自己鍾意、待遇好，又符合自己條件嘅工，真係仲難過中六合彩。雖然人真係好需要一份工嚟養活自己，之但係如果真係覺得唔啱，花多少少時間去搵同等待，或者會有不一樣嘅收獲。
文：Noelle
熱門空缺
