新年假期期間，日日都要四周圍去拜年食飯，食到個肚都脹埋，你以為假期完咗就一天都光曬？唔好傻喇！你老細仲等住同你開年，你啲團年飯、開年飯、春茗，有排都未食完啊！其實都係食餐飯啫！點解打工仔會咁怕呢？

陪笑應酬
平時見客已經要戴曬假面具做人，依家食餐飯都不得安寧，對住啲上頭級人馬，又要應酬佢哋，又要陪笑陪酒，成隻哈巴狗咁，餐飯仲邊食得開心啊？就算唔洗應酬，都要恭恭敬敬、客客氣氣咁，真係好壓抑呢！

各自修行
話就話係同事，但都熟極有限啦！大家平時食lunch都冇兩句，依家仲要對住3粒鐘你眼望我眼，你話尷唔尷尬喇？最後咪又係同檯食飯，各自修行，個個喺度撳手機、發吽豆，咁樣團年法又有咩意思呢？

單一菜式
每逢大時大節，酒樓啲套餐通常都係一式一樣！慳返啲功夫啊嘛！有鮑魚、花膠咁又點？過年仲食唔夠咩？況且中菜碟碟餸都一樣味，真係食多一餐都嫌悶！好彩唔洗夾返錢啫！

大獎機會不是我的
食親團年飯，通常都離唔開抽獎環節，雖然就話人人有獎，永不落空，但通常都係周圍啲人抽到好嘢，自己就一係中啲bingo獎、檯獎，一係就中埋啲唔等洗嘅電飯煲、焗爐、榨汁機，真係唔中好過中，中完要捧返屋企先係個問題！拎到返去又冇地方擺，何必呢？

嘈到拆天
酒樓本身已經夠嘈，依家仲要坐曬成間公司嘅人，有啲就圍埋一二邊大聲講大聲笑，有啲飲大咗就周圍叫周圍嗌，混埋啲打牌聲、卡啦OK聲、電視聲，真係唔聾都耳鳴！飲醉咗嗰班人仲恐怖，話曬唔知佢哋會唔會突然之間發癲劈友架嘛……

是非飯局
難得成班同事聚埋一齊，又有機會見到其他部門嘅人，是非精仲唔即刻口水多過茶咩！每次去呢啲公司飯局，都要聽啲同事講是非、放毒針，都唔好話唔辛苦，我都係想安安靜靜食餐安樂茶飯啫！唔係人人都想聽你哋講A同事拍過幾多次拖，B同事又離過幾多次婚架嘛！

失去私人時間
公司團年飯多數都係夜晚或者weekend搞，放咗工都要對住班同事，仲要應酬老細，同開OT根本就冇分別。Weekend搞仲衰，無啦啦冇咗個夜晚，仲諗住唔洗返工可以喺屋企打吓機、煲吓劇，約friend出去行街睇戲架嘛！依家又要出席公司飯局，無端端又蝕咗晚畀公司喇！

呢幾年好多人都會趁農曆新年去旅行避年，但避到親戚，避唔到老細呢！你唔去食公司團年飯，同事會喺背後講你，老闆又會小器嬲咗你，好好醜醜咪去應酬吓囉！還掂都係要食飯架啦！

文：Noelle