台式飲品直都係香港人嘅最愛，荼餘飯後會想飲返一杯珍珠奶茶，但除咗台式飲品外，好多人都會揀啲中式飲品，因為好多人都覺得中式飲品材料睇落好似健康啲，亦都會較天然，對比其它嘢飲會無咁有罪惡感。好似，菊花茶，豆漿呢啲咁，但你又知唔知中式飲品係咪真係咁健康？

 

近日消委會就連同食安中心做咗個測試，喺中式食肆、火鍋店、茶餐廳等，搜集咗11類共101款由食肆自已沖嘅中式飲品，例如豆漿、柑桔蜜呢啲咁，測試當中嘅含糖量。而結果相當令人得人驚！因為有3成樣本都會屬於「高糖」嘅飲品！

 

根據衞生署發出嘅《學生小食營養指引》，指出每100毫升嘅飲品，如果糖含量超過7.5克就算屬於高糖分飲品；而根據依加嘅營養標籤規例，每100毫升嘅飲品，唔超過5克糖先可以稱為「低糖」，唔超過0.5克糖先算「無糖」。

 

消委會搵到嘅五個羅漢果飲品樣本有四款糖含量係低於0.5克/100毫升，係可以入納入「無糖」。

 

而豆漿都係屬於糖含量較低嘅類別，31款樣本都不屬於高糖分，而無添加糖嘅4款樣本，糖含量每100毫升只係有0.35至0.71克，係健康之選！

 

打邊爐好多餐廳都會有酸梅湯呢啲酸甜嘢飲去開胃同消滯，但今次測試發現，10款樣本嘅酸梅湯有一半高糖，尤以旺角百利火煱海鮮酒家嘅樣本含糖最高，每100毫升有16克糖！

 

而5款嘅山楂飲品有4款高糖，尖沙嘴泰豊廔嘅山楂茶樣本更加驗出每100毫升有19克糖，即係差唔多有成4粒方糖，以一杯飲品大概係250毫升去計，飲一杯已攝取47.5克糖，接近世衞建議成人每日50克糖嘅攝取量上限。

 

1. 如果可以「少糖」、「無糖」，就盡量叫啦！

2. 留意飲嘅分量，尤其係喺打邊爐時，要切忌過量飲用

3. 少啲飲酸梅湯同山楂飲品

文：阿飛