好多人都話女人有兩個胃，一個就係食飯嘅胃；而另一個就係用嚟食糖水。甜嘢係人都鐘意食，而對好多人嚟講，飯後唔食糖水就總覺得差咗啲嘢咁，成餐飯就好唔完滿。而香港無論係中式、日式定西式甜品都總有捧場客。但你又知唔知邊款甜品係最多糖？
 
早前，消委會連同食安中心做咗一個測試，檢驗市面常見嘅10款即整甜品，包括：紅豆沙、綠豆沙、番薯糖水、豆腐花、楊枝甘露、芝麻糊、椰汁西米露、腐竹雞蛋糖水、喳咋及合桃露，合共一百個樣本，研究佢哋嘅糖含量同卡路里。你知唔知邊款最多糖？



楊枝甘露糖含量最高！
以芒果為主要材料嘅楊枝甘露係咁多款甜品入面最甜，平均每100克就有11克糖。就咁睇好似無咩嘢，但如果一份330克去睇，咁我哋食一碗就己經吸收咗40克糖，相等於世界衞生組織建議每日攝入限量50克嘅8成（以每日從膳食攝入2,000千卡能量計算）。
 


番薯糖水排第二！而綠豆沙則第三！
番薯糖水糖含量同樣驚人，平均每100克含10克糖，當中有2個樣本每100克更含12克糖。



糖含量排第三的是綠豆沙，平均每100克含9.5克糖，而其中1個樣本每100克更含高達13克糖，係今次測試入面糖含量最高嘅單一樣本。
 
咁食邊款會健康啲？

1. 豆腐花
2. 椰汁西米露
3. 腐竹雞蛋糖水

呢三款都係糖含量普偏較低，屬於「低糖」嘅甜品！相對可以多啲食！
 
點先可以食糖水食得健康啲？！
食得糖水就當然係預咗佢甜㗎啦，如果唔係我哋就去咗飲涼茶算啦。但係為咗我哋嘅健康著想我都要好好控制一下自己，而想食得安心啲可以參考以下幾點！

1. 要睇返甜品嘅分量，因為如果個碗越大就越代表你會吸收更多嘅糖份，所以如果太多就唔好食哂！
2. 如果太多可以同你身邊嘅人分享！如果有的話。
3. 可以揀啲多生果嘅糖水咁就會相對少啲糖份！

 文：阿飛