熱門話題
【打工仔健康】返工成日口痕食零食？如何對付為食？
刊登日期: 2019-06-20
打工仔平時喺office，除咗做嘢、食飯同去廁所之外都冇咩好做，想抖吓、放鬆吓又唔可以喺office行嚟行去咁引人注目，咪唯有食啲零食開心吓！所以好多打工仔都會買定好多零食放喺櫃桶以備不時之需！壞處就係成日食零食，返工又坐得多、少運動，食吓食吓就愈食愈肥！究竟有咩方法可以醫好口痕啊？
轉移視線
人通常一閒落嚟就會想搵嘢食，所以要對付嘴饞，最直接嘅方法，就係唔好畀自己閒落嚟，keep住工作，keep住忙碌，咁就唔會有咁多時間和機會畀自己食零食，可能做做吓嘢你會完全唔記得咗自己想食嘢添！如果真係好想食嘢，都冇話唔畀嘅，可以食一、兩塊餅，飲杯水、茶或咖啡，稍為滿足吓口腹之慾，做嘢可能都醒神啲、有動力啲。
改變用餐時間、少食多餐
要對付嘴饞，可嘗試縮短餐間時間，例如你本身係7點食早餐、12點食lunch、夜晚8點先dinner，可改為返到公司9點幾、10點先食早餐、12點食lunch、放工6點半、7點食dinner，藉以減少飢餓感的產生。若無辦法做到縮短餐間時間，可嘗試少食多餐，一日內進食次數可增加，但進食的份量減少，咁除咗可以趕走飢餓感，仲可以維持血糖的濃度平衡，減少下一餐的熱量攝取。相反，千祈唔好餓一餐飽一餐，咁唔單止傷胃，仲好容易會引致精神性暴飲暴食。
高蛋白早餐
蛋白質食物能有效刺激胃酸分泌，延緩腸胃蠕動「排空」的時間，有助抑制食慾，使人產生飽足感。因此，朝早大家不妨食返個高蛋白嘅早餐，食隻蛋、飲杯奶，午餐食少少肉和大豆類食品，下午應該會冇咁容易口痕架喇！
來一杯下午「茶」
下午3點至6點，由於體內的血糖開始降低，人就會開始變得慵懶，為了打起精神，就會想搵啲嘢嚟食，呢個時候，不如嚟杯下午「茶」？不過唔係叫你食炸髀、紅豆冰嗰種下午茶喎！而係真係叫你飲下午「茶」！咖啡因是天然的食慾抑制劑，綠茶亦都經已證實可以抑制飢餓感。因此，以後一到tea time，一於沖返杯蒲公英茶、洋甘草茶、綠茶或紅茶啦！將肉桂粉灑喺咖啡或茶上面，都有同樣的功效！咁以後就唔洗怕口痕會係咁食嘢啦！
為食係人嘅天性，尤其是返工咁悶、咁dry，就更加想食啲零食放鬆吓架啦！只係食還食，都要識得節制，唔好畀嘴饞控制到你！要對付返佢轉頭？就記得mark實以上4點喇！
文：Noelle
熱門空缺
