熱門話題

【​理財有道】5個生活小習慣助你儲錢成功

刊登日期: 2019-06-14

一到月尾就乾塘?每個月啲卡數乸脷到唔敢睇份帳單?人真係一有錢就好易身痕,唔經唔覺就好易洗大咗。當你月薪萬5蚊,洗吓洗吓,最後每個月都唔知儲唔儲到8千蚊。其實儲錢從來都唔係一件難事,難就難在你有冇節制能力,同埋識唔識得理財架啫!
 
記錄每日開支
好多人消費之所以唔識得節制,係因為佢哋冇一個檢討同反省嘅機會。習慣每日寫低當日嘅開支,你就可以有個時間回顧吓自己嘅消費項目:今日洗多咗,聽日開始要慳啲洗,唔好亂咁買嘢;上個月原來買咗好多衫都未着過,今個月唔好再買衫住;今日冇啦啦手痕買咗啲唔等洗嘅玩具返嚟,諗諗吓其實買嚟都冇用,以後都係諗清楚先好買嘢。喺你記錄每日開支嘅同時,其實都係一個機會畀你反省同review一次自己嘅消費,作為下一次消費前嘅提醒。
 
消費冷靜期
有冇發覺好多嘢買完返屋企,最後都係冇用過、得個擺字呢?全因為人消費嘅時候,好多時都係出於衝動,冇諗清楚自己有冇需要就畀錢。其實以後買嘢之前,不妨畀一日時間自己考慮清楚,係咪真係有錢買、係咪真係好有需要、唔買唔得?或者沉澱咗一日之後,你會發覺其實你唔係真係咁想要,或者咁需要嗰樣嘢。
 
儲存固定金額
所謂「一有錢就身痕」,好多人一出糧就拎啲錢去fing,買錶、買模型、買衫、買袋,到最後有錢剩先放入銀行度儲起佢,咁樣又點會儲到錢呢?儲極咪又係一個月多嗰一千幾十。最好亦都係儲得最快嘅方法,都係一出糧就先儲起6成左右,例如你月薪2萬,就將其中嘅萬2蚊入落戶口,其餘就好似以前父母畀零用錢你咁慢慢洗。有quota,自然就唔會亂咁洗,不過最緊要係要撳住自己、唔好畀自己亂咁提款啊!
 
控制誘惑
如果有錢就身痕,咁好簡單啫!冇錢咪唔痕囉!取消八達通自動增值、唔好帶咁多cash出街、銀包淨係放一張信用卡以備不時之需、delete所有畀錢app、唔行咁多街等等,其實都係一種自我約束嘅方法,係就係老套啲,但冇錢、唔行街,自然就唔洗買嘢,買唔到嘢就會儲到錢。從源頭開始克己,都未嘗唔係一個好習慣。
 
奢侈品可免則免
就算你本身唔係好大洗,但生活上係咪真係樣樣都係必須品、一定要買呢?咖啡係咪日日都要飲呢?下午茶係咪日日都要叫呢?手袋係咪一定要買名牌架呢?Lunch會唔會考慮吓間唔中帶吓飯咁呢?有時唔係唔畀你買嘢,但既然有啲奢侈品係有替代方案,或者唔係日日都需要嘅話,咁點解唔慳返啲錢呢?免去呢啲可有可無嘅消費,慳埋慳埋應該都可以儲到幾多錢架!
 
洗錢易儲錢難,咁辛苦做咗成個月嘢,碌一碌就冇咗幾千銀,唔心疼咩?唔好誤會,唔係叫你乜都唔好買!而係鼓勵你以後都要諗清諗楚先好買!唔好買完先嚟後悔!培養以上5個生活小習慣,每個月一定可以儲到更多錢!

文:Noelle


標籤:
理財有道
理財
消費冷靜期
儲錢習慣
查看全部 熱門話題


你可能感興趣