世界杯後日就開鑼，香港地睇波多數都係深宵時段，比賽時間越夜越精彩，班球迷同事們精彩完瞓得一陣就要爬起身返工，最怕係遲到嘅心理壓力！不過邊個話睇波一定第二朝返工捱眼瞓、工作懶散或者射波唔見人？
 
Adecco調查結果發現 ，近年愈來愈多人認同員工投入度對提升公司整體競爭力極之重要！  當中好多員工更認為，彈性工作中感受到自由度會直接影響做嘢投入感。而一隊球隊，一個組織，要合作團結先至可以得到最大嘅勝利，轉眼間已經進入世界盃足球大賽嘅季節，點樣可以唔影響公司運作，員工又可以安心觀賞世界盃賽事，甚至同時提升公司士氣？
 
根據Adecco研究報告嘅建議方法，公司HR可以運用四年一度嘅盛事 - 世界盃而制定相應工作策略，協助公司團隊上下一心，決勝千里！

1. 批准員工於盃賽期間清理年假 
假期遲早都要放，大家迫埋一齊放清明復活聖誕新年，都係一件令人頭痕的事，一於攞正牌放大假睇波，有健康娛樂調劑生活，更有動力回來投入工作。 

2. 彈性上班時間 
確保公司能夠正常運作嘅情況底下，安排同事返晏啲或者收早啲，工時不變，等員工可以得到自由時間休息之餘，工作照樣能夠完成得漂亮，Work-Life Balance 不再抽象。

3. 以公司名義舉辦觀賞活動
獨樂樂不如眾樂樂，例如去到決賽周，一於開宗明義將定期飯局轉去睇波，不嘗為一樁美事，咁班手足就可以開開心心咁同腦細一齊睇波，機會難逢，相信上進同事都會積極參與。
 
4. 舉辦賽果競猜活動
例如開放投票，估下邊隊勁旅會入圍決賽周，抽籤勝出者除咗得到獎品之外，仲可獲得額外假期作為特別獎勵，咁你將會見到同事們最真摯嘅笑容，又係一個提高員工歸屬感的好機會。
 
5. 溫馨訊息小提示
作為真心鼓勵的僱主，最貼地嘅就係開個群組，訊息提示埋佢哋每一場賽事嘅時間，仲可以一齊討論埋一份加強聯繫，腦細參與度高，咁就唔會比人有機會閑言閑語啦。

6. 堂堂正正出通告
好多時睇完波夜已深，貼心提下同事飲咗酒唔好渣車要注意安全，正式將呢份關心出一個通告貼於公司當眼處，等同事收到呢份愛心，做嘢都更加上心。

7. 佈置辦公室增添氣氛
大家新年都會貼揮春，好多節日年年都有，而世界盃四年先一次，咁難得係咪可以邀請/幫忙同事佈置下自己個位？工作環境有好氣氛，心情好士氣都會跟住好。

8. 身體力行運動支持
雖然喜歡睇波唔一定喜歡踢波，而為咗同事身體健康，有氣有力工作，可以自願性質舉辦內部足球比賽應吓節，唔落場踢都可以現身支持做下啦啦隊，真正拉近團隊之間嘅關係，培養良好默契。
 
最後，易地而處，每個打工仔做嘢個心都係為咗自己，如果能夠俘虜員工的心積極向住公司，做嘢嘅效率自然大大提升，認真做嘢唔代表要停留喺拘謹嘅氣氛，適當時間都要唞一唞，試想像一枝箭向後拉，只係為咗發射得更前更遠，夥計們做得開心睇波放心，得益又點止係世界盃！

2018世界盃分組賽賽程表：
2018世界盃分組賽賽程表(I) - A組－D組
2018世界盃分組賽賽程表(II) - E組－H組

文：金金


  
永遠保持起碼有兩滴墨水
唔寫野嘅時候個腦都不停諗緊嘢
一追再追堅持追夢
You only live once