依家人人都識得MultiTasking（多重工作處理），一手上網爬文做嘢，單邊耳仔聽緊歌另外隻手覆緊WhatsApp，個腦諗緊今晚食乜。／Slash 都有異曲同工之妙，就係Multi Careers（多重身份職業者），金金身邊好多朋友以及自己都係Slash，呢個趨勢係咪真係自由啲搵多啲？一齊嚟解構下！

一直以來好多人都係Slash只係自己唔覺，例如大律師可以係議員，又同時係乜乜創辦人大有人在，咁樣係貪心多心定係好有心？

小編個人認為兼顧多重職業，證明你個人有頗高嘅時間管理能力，做多重工作確實為生活帶來唔同嘅趣味性，例如身邊朋友日頭做寫字樓工，夜晚放工返屋企作畫做埋小畫家，星期六/日就去市集賣藝或者手工製品一嚐小老闆滋味，當你將生活投放喺唔同身份，轉換工作環境嘅同時亦都幫你轉換左心情，橫跨多個工作領域，亦都令你擴闊左生活圈子，每日認識多咗唔同界別嘅人，偉人曾經講過：呢個世代識人好過識字！

收入來源
多咗工作種類=多咗收入？好似好着數喎！有啲人Slash嘅工作全部係要等機會，例如街頭賣藝/演員/配音員/樂手/作家，相對收入冇咁穩定，如果冇父幹支持可以學吓投資，始終藝術工作者都要食飯，衣食住行樣樣都係錢，好多時都係表面風光，有時間都要攞嚟練習，未必有咁多時間精神去做散工賺錢。

Slash得與失
食得鹹魚抵得渴，寧願自己時間自己掌握，要自由好過跟住個更表返工，不過你都咪話冇壓力，唔同職業要做嘅工作性質唔同咗，都要有返咁上下適應能力，先問下自己分配時間之後係咪做得到又做得好，咁先長做長有！例如一個舞台劇演員，佢同時可以做配音又可以做音樂，時間分配得唔好就會俾咗壓力自己，反而得不償失，結果令到自己更加困身。計啱啲時間，適當嘅時候做適當嘅事，唔再畫地自限，只要你個心好想好想，真係做乜嘢都可以，人人都可以係Slash ！

文：金金


  
永遠保持起碼有兩滴墨水
唔寫野嘅時候個腦都不停諗緊嘢
一追再追堅持追夢
You only live once