要數冬天最受香港人歡迎嘅活動，當然係打邊爐。喺凍到流曬鼻水嘅天氣下同親朋戚友坐埋一枱，烚下響鈴同肥牛，認真幸福！但呢個幸福係咪直到永久？成日打邊爐唔止熱氣，仲會幫你增磅同影響健康。想打邊爐得嚟又保持健康，就要記住以下4個要點：
1. 湯底清淡多菜
打邊爐最重要係湯底，想要鮮甜美味又健康，就一定要揀以蔬菜為主嘅湯底。蕃茄粟米湯酸酸甜甜夠開胃，芫茜皮蛋清熱降火……都知唔少人會貪方便出去買湯料包，但始終係加工食品，點都會高鈉重味精，自己買食材整肯定更好！更加唔好諗要咩濃味湯底，好似麻辣湯底，都唔知落咗幾多匙油。仲有，如果烚得太多肉會令湯底變得更油，到時就唔好勁飲個湯喇！
2. 慎選配料
永遠記得「多菜少肉」！揀多啲蔬菜同菇菌類烚咗嚟食先，既可以打定底等自己一陣唔會唔夠飽而暴食，蔬菜嘅纖維仲有助腸道健康。肉類要揀冇咁多脂肪，好似鮮牛肉、瘦肉、雞柳、鯇魚肉……加工同油炸食品雖然可口，但真係要記住「一件起兩件止」—好似腸仔、午餐肉、響鈴，高鈉又高脂，唔覺意食多咗真係有損健康。
3. 吹涼少少放入口
成日話打邊爐熱氣，除咗係因為關麻辣、沙嗲呢類臊熱湯底，仲有濕毒油炸配料事之外，其實同食物溫度有莫大關係。平時食小炒都會攤一陣再食，但打邊爐淥完最多就咁吹一吹，通常都係就放入口，食物溫度自然高好多。食溫度太熱嘅會令口腔黏膜變弱，容易生飛滋之外，仲會增加患口腔癌嘅機會。除咗傷及口腔，食道同腸胃都會因為承受唔到高溫而受傷，同樣增加患食道癌同胃癌風險。
4. 食夠收口又收手
一班人開心打邊爐，淥吓淥吓好多時會唔覺意食多咗。好好控制選擇配料嘅份量，千祈唔好眼闊肚窄。意大利就有研究發現慢慢咀嚼，食到七成飽可以令身心更健康。事實上，咁樣可以等腸胃有足夠時間同空間消化。如果食到又飽又滯，腸胃要用更多時間消化，仲搞到個人又冇精神，咁又何必呢？
今個冬天，就一齊同親朋好友健康咁打邊爐啦！
文：小C
15 Oct 2025 
Contact Us
Notice
Back to Top
中文