​佛系上司 VS佛系下屬

佛系上司 VS佛系下屬

刊登日期: 2019-03-27

個個都自稱佛系唔通個個都想佛系咩，佛系乃是一種有目標咁樣去放下，追求平和淡然嘅生活態度，緣份一到目標自然達成，咁如果套用係工作環境又會係咩玩法呢？

佛系上司	佛系下屬
不干預	不上進
不捽數	不用腦
不讚賞	天天扮工
天天開會	與世無爭
緣份到了自然到數又升職	緣份到了自然升職加人工

佛系上司
上司乜都唔理不聞不問淨係見佢喺房開會同招呼腦細，冇人理你係咪件好事呢？長此下去咁樣容易造成溝通不足，上下不一致，搞到工作業績不似預期，好多時做細嘅意見上傳唔成功，上司指令下達又唔清晰，等嚟等去除咗嘥時間，問題都只會係越積越多冇解決過。

佛系下屬
想上位又乜都懶理，你急我唔急，上司係咪真係冇佢符？只要上司願意俾個重任佢去完成，指定要佢報告，越唔肯做越要你面對嘅時候，積極向上呢種心態絕對可以培育出嚟，事在人為嘅啫！就算日日準時返工，唔准時放工，唔做是非精做個小乖乖，問你一句：點解要升你？

佛系上司 VS佛系下屬：兩敗俱傷
如果俾你對住個同樣都係佛系上司，咁就毫冇懸念大家有共同目標，必定係最佳拍檔啦！皆因兩者都係等緣份到，天天扮工，最大損失應該係公司，唔執笠就要掩住半邊咀偷泣啦，點解？其他同事要做埋你嗰份仲唔喊出嚟？唔該一齊叫聲：嗚呼哀哉！

進取型如何自處
遇着個進取型上司緊貼，佛系下屬一樣有位偷，除非遇上伯樂激起下屬鬥心變到好上進，肯學肯做有業績自然有目共睹，緣份就到啦！可以做定件新衫升職嗰陣着，又促進左經濟繁榮！

至於，進取型下屬講幾多做幾多都係枉然，出謀獻策錯對象除咗浪費表情之外，陣間好似教個佛系上司做嘢質疑佢咁，容乜易係佢心裏面暗暗覺得要佢做咗多啲嘢阻人收工？加埋小氣又忌才嘅話更加唔識重用你，又或者之後俾你Lead住嘅話仲得了嘅？冇錯㗎！你夠上進的話緣份又到嘅瞬間下屬可以變成上司嘅上司，佛系世界冇嘢係冇可能嘅。

最後，上司下屬價值觀相近又一齊進取，咁緣份一到自然拍住上，齊跳十字步。好簡單，讀完金金呢篇好文要行動先係王道！

文：金金