同唔熟嘅同事 social，冇話題就好容易陷入尷尬 dead air。唔講嘢場面僵硬，硬搵話題又顯得虛偽，究竟點樣先可以自然啲？

問問題先係最佳破冰術
第一招係多發問。問問題永遠係最簡單嘅破冰方法，尤其係針對對方專業範疇去問，唔單止可以增加互動，仲會令對方覺得自己有價值。聽到對方講嘢時，你可以順勢追問，例如知道同事放假，就問佢會唔會去旅行，再分享自己嘅經歷；或者知道佢跟緊大 project，就問吓進度同挑戰。慢慢延伸落去，對話自然就愈講愈多。

單字回應最易令場面死寂
第二招係避免單字回答。好多 dead air 都係因為答得太簡短，好似「係啊」、「唔知啊」、「嗯」咁，令對方無從接話。下次有人問你嘢，不妨答得詳細啲，表達多啲自己嘅想法，對話自然會豐富好多。

身邊事物都可以變話題
第三招係利用周邊環境做話題。真係冇嘢好講嘅時候，可以隨便拎身邊事物嚟傾，例如附近新開餐廳、公司最近請人、熱門電影、甚至係生活小物。雖然話題未必有深度，但總好過大家你望我我望你。

放下手機，釋出善意
第四招係表達你想傾談嘅意願。唔少人覺得尷尬就低頭玩手機，結果大家都沉默，氣氛更疏離。其實只要放下手機，釋出善意，表示自己願意聽對方分享，對方就會感受到你有心想繼續傾落去。

Dead Air唔再可怕
總結嚟講，職場上最怕就係 dead air，但其實只要你肯開口，場面就會自然流暢得多。記住，口就生喺人度，唔想尷尬？出句聲就解決曬啦！

文：Noelle＠ECjobsonline 編輯部