政府推出嘅「免入息審查公共交通費用補貼計劃 」自1月起開始實施，今個月16號開始大家就已可在港鐵站、便利店等地拍八達通卡「收錢」，400蚊以外嘅車費可獲25%補貼，上限為300蚊。對於交通負擔好重嘅市民嚟講，哩條數可能只做到杯水車薪。有居住天水圍但在觀塘返工嘅巴打就話，住得咁遠先有130蚊津貼，坦言嬲到有啲「炆炆地」，繼而忽發奇想，趁第二日唔駛返工，一於同一位朋友實行「觀塘行返天水圍」遠征！

 

巴打在討論區「打卡」，「文字直播」持續更新自己情況，一眾網民十分關注佢嘅進度，提醒佢要萬事小心。事主有所準備，帶咗兩個充電器，務求電話充夠電，以備不時之需。佢決定行山路，取路元荃古道，即係深夜行山，猶如經歷「毅行者」活動。

 

佢先在觀塘海濱長廊附近出發，沿住麗晶花園方向行，去到九龍城。要行「史詩式回家旅程」，當然要補充足能量。佢在九龍城食咗晚飯，更有朋友過嚟打氣。之後，佢繼續上路行去旺角、深水埗、美孚。嚟到呢度佢就停一停先，因為要搵廁所方便。

 

風雨無令巴打卻步。佢嚟到荔景時雖然有雨，但無諗住放棄，「睇」住嘅網民都一齊集氣為佢加油。當嚟到葵芳時，再有朋友到場為佢打氣。經過葵芳、荃灣時，佢都有買啲補給，包括買咗兩隻香蕉當宵夜。

 

嚟到凌晨時段，佢已去到元荃古道。網民提醒佢，呢條山路其實好多狗，一定要加倍小心。慶幸係巴打一路都有「報平安」，更有post由山上望落嚟嘅夜景。佢行山時都不諱言，其實「好掛住屋企張床」，網民又再集氣希望佢快啲返到家。一路睇住「直播」嘅網民，見證住佢行通宵，終於嚟到大欖郊野公園範圍。朝早佢終於入直路階段，沿住元朗一直行，經過11個鐘頭，終於望到屋企！

 

一路「陪」住巴打行山嘅網民都大讚佢好勁，十分佩服佢嘅毅力，成件事好青春好熱血，甚至有人形容佢勁過軍隊！大家都希望佢早啲休息。巴打笑言自己對鞋無事，不過對腳腫咗。佢事後做個檢討，直言今次有啲「高估自己能力」，比預期用多咗時間。小編睇到呢度，都不禁要寫個服字！所以只要有毅力，無乜事係做唔到，幾遠嘅路都可以行到。

 

來源：連登討論區