海洋公園一向「老少咸宜」，早排農曆新年仲一度因為「逼爆」要實施人潮管制，認真犀利！海洋公園行政總裁李繩宗（Matthias）指，今年春節入場人次，較去年同期有雙位數字升幅，相信受惠於港珠澳大橋同高鐵香港段兩大基建開通。最近仲同香港大學簽訂咗合作備忘錄，準備為大家帶來更多富教育意味的活動。

春節入場人次錄雙位數升幅
Matthias指，今年農曆新年人流強勁，比去年春節同期錄得雙位數字百分比增長，據初步調查統計，當中都多咗唔少旅客經兩大基建到訪，估計海洋公園萬豪酒店正式開幕之後，可以讓旅客有更多不同體驗。

除此之外，海洋公園亦聯同港大簽訂合作備忘錄，計劃加強雙方在創新教育同研究方面的合作，例如6月21至22日即將舉行第一屆海洋公園STEAM教育國際會議，邀請唔少國際專家學者為教育工作者演講；4月復活節假期間，又會有個「識水嘉年華」，利用多種互動裝置，讓小朋友邊玩邊學習本地河流等水資源；仲會個專為港大學生而設的Hackathon黑客松比賽，讓參加學生有機會學以致用，嘗試為公園設計出提升遊人的體驗方案，勝出的方案更有機會獲園方採納應用！