求職錦囊

【​​職場心理學】無人工加又唔知點同下屬開口?教你Appraisal時點做好人

刊登日期: 2019-01-03

Appraisal對打工仔嚟講固然係非常之咁重要啦,係搏升職同加人工嘅好機會嚟架嘛。但係相對地,Appraisal對啲上司阿頭嚟講可能又係一種挑戰嚟架喎。因為表現好嘅員工唔一定得到佢想要嘅待遇架。可能啲打工仔會問你:公平咩?係唔公平架啦,不過Appraisal個陣時又無理由直接咁樣同班做得嘢下屬講架嘛。萬一佢哋聽完唔gur跳槽,咁自己咪少咁個得力助手囉。咁到底點先可以拒絕員工嘅要求時候又唔洗做晒醜人呢?

唔少職場心理學家都強調上司要有同理心,先係最有效嘅領導嘅方法嚟嘅。其中一個嚟自德國漢堡大學嘅心理學家Meinecke,係佢2018年一篇有關傾Appraisal時候嘅溝通風格嘅研究入面,仲發現咗若果上司阿頭溝通風格係顯示到佢有同理心嘅話,係同員工係Appraisal之後改變佢嘅陋習同埋對上司提高好感度有著莫大嘅關係架。咁到底點先可以顯示到自己有同理心呢?Meinecke就指出少啲用第二人稱(亦即係「你」或者「你哋」),又或者多啲讚同員工講嘅嘢嘅話,都可以顯示出你嘅溝通風格更有同理心架。

但係有時做阿頭嘅又真係要係適當嘅時候拒絕員工架喎。下下讚同員工,做下好人嘅當然個個都想,但係唔一定個個可以加人工福利架嘛。咁仲有咩方法呀?

Meinecke就仲有一個提議,佢嘅研究就發現原來只要上司嘅語言風格同埋下屬嘅語言風格配合到,夾到嘅話,員工都會覺得上司有同理心架喎Meinecke指出,語言風格主要由人稱(即係「我」、「你」、「佢」)、否定、認同、同埋停頓節奏所構成嘅。如果無得係否定同埋認同句子上面落功夫,不妨試下係人稱同埋停頓位依兩方面落手,就翻個員工嘅風格呀。

係人稱上面,除咗之前講嘅減少用個「你」或者「你哋」隻字,嚟減低聽上去似係缷膊嘅哽耳感覺之外,仲可以試下就翻員工用嘅人稱。譬如Meinecke發現打工仔係Appraisal嗰時多數會用到第一人稱,亦即「我」。咁樣嘅話,上司可以多用翻「我哋」去做句子嘅開頭,表達出同坐一條船嘅感覺嘅。

係停頓節奏方面,上司可以就翻員工本身講嘢嘅節奏,去拉長或者刪減自己講嘢嘅速度同埋長短,令員工感覺順耳啲。例如一個員工係Appraisal嘅時候無乜自信,講嘢好慢嘅,上司就不宜將自己想講嘅嘢一論嘴咁好快講晒出嚟,否則會俾人一種高高在上嘅感覺架。若果員工傾向解釋同埋討論多啲嘅,上司應都唔該係表達認同或者否定上就咁講yes or no就算。過短嘅語句會俾到人一種唔想溝通嘅感覺嘅。

最後,雖然Meinecke係佢篇研究入面無提及過,但係一般心理學都有個理論,就係眼神接觸對於表達同理心都好重要。當然就唔係叫你全程Appraisal都睥住人啦,咁樣連員工身後可能有嘅攝青鬼都嚇到返翻去啲神枱位啦。但係適度嘅眼神接觸係會令人覺得你願意參與討論同埋真心聆聽緊對方講嘢嘅。

各位上司要記住依幾個重點,搣甩你Appraisal時係員工心目中嘅醜人形象啦。

文:特雷弗
讀嘅係心理學,做嘅又係心理學嘅嘢,志願係唔再做心理學嘅嘢。

資料來源:Meinecke, A. L., & Kauffeld, S. (2018). Engaging the Hearts and Minds of Followers- Leader Empathy and Language Style Matching During Appraisal Interviews. Journal of Business and Psychology, 1-17.


標籤:
職場心理學
Appraisal
加人工
特雷弗
跳槽
查看全部 求職錦囊