求職錦囊
【職場心理學】工作範疇多變做嘢會上心啲？白領藍領有分別
刊登日期: 2018-10-11
現今職場要求打工仔手執幾十把刀，利唔利唔緊要，最緊要話自己識。一個文員又要識排版，又要識寫文，又要識用Photoshop，一個人要做幾百萬樣嘢。有時啲嘢明明job description都無寫到明嘅，但老細都格硬搵你幫手頂埋佢。「喂大佬，請多個人啦。」可能係各行各業打工仔嘅共同心聲。咁其實係職場心理學入面，一個人同時做幾十萬樣嘢會對工作表現有咩影響嘅呢？
最近有一份心理學研究指出不斷轉變嘅工作性質同內容感到唔安全嘅話，係會對角色內工作績效造成負面影響架喎。咩叫角色內工作績效呢？簡單啲嚟講，就係講緊一個打工仔完成佢份內基本職責嘅表現啦。
職場心理學家Gabriel Fischmann嘅研究搵咗337位參加者，發現對於一啲從事相對上較高專業嘅人（包括高級白領同經理），由工作性質不斷改變帶嚟嘅不安感係會同工作績效形成一個惡性循環。對於依啲高專業人仕，依種不安感會令到員工基本職責嘅表現變差，而轉差嘅工作變現又會加強返依份不安感。
而對於相對上較低專業嘅人（包括藍領同低級白領）嚟講，雖然轉差嘅工作變現唔會加重翻依份不安感，但工作性質不斷改變帶嚟嘅不安都會直接令工作表現變差。
總括嚟講，無論係咩專業都好，不斷改變嘅工作性質，都會令到所有打工仔嘅工作表現變差，越做越hea添架。而對於專業人嚟講，甚至乎會形成一個惡性循環，令佢哋對工作更加無安全感。各位阿頭若果想保住人才，就千祈唔好成日堆晒啲唔關事嘅嘢俾人做啦。
文：特雷弗
啱啱入職夠一年嘅小薯。讀嘅係心理學，做嘅又係心理學嘅嘢，志願係唔再做心理學嘅嘢。
資料來源：Fischmann, G., De Witte, H., Sulea, C., & Iliescu, D. (2018). Qualitative job insecurity and in-role performance: A bidirectional longitudinal relationship? European Journal of Work and Organizational Psychology.
熱門空缺
招聘日 Recruitment Day ( 即 埸 面 試 及 錄 用 )
EF Language Solutions Hong Kong Limited - English Centers (former Englishtown)
EF Language Solutions Hong Kong Limited - English Centers (former Englishtown)
