根據消委會2025年測試，市面25款微波膠盒中有7款釋出塑化劑，長期使用或損害肝腎、生殖系統。打工仔帶飯雖然慳錢又方便，但用錯膠盒翻叮，隨時中伏！

香港打工仔與OL愈來愈重視健康與節省開支，根據本地調查，超過58%上班族每星期至少自備午餐一次。不少人會將自家製美食放入膠盒，再用微波爐翻熱，快捷又方便。但你又知唔知，膠盒加熱後可能釋出有害物質，影響健康？

消委會早前測試市面25款標榜可微波加熱的膠飯盒，發現：

• 7款膠盒釋出微量塑化劑（包括Tark、新海洋、Everlock等品牌）
• 1款膠盒於蒸發殘渣測試中釋出過量物質
• 塑化劑長期攝入可損害肝臟、腎臟、生殖系統及發育功能

帶飯一族健康叮飯貼士

1. 揀膠盒要睇清物料
選用標示「PP」（聚丙烯）製造的膠盒最穩陣，耐熱達120°C，適合微波爐使用。
📌 小貼士：膠盒底部三角形符號入面有個「5」字，即代表PP物料。
⚠️ 注意：不少膠盒盒身係PP，但盒蓋卻用PE或PS製成，加熱前記得拎走膠蓋！

2. 使用前徹底清潔
首次使用前用洗潔精清洗，避免用百潔布刮花表面，減少物料釋出風險。

3. 定期更換膠盒
膠盒如出現以下情況應即時更換：

• 變硬、變形、由透明變霧化
• 表面刮花或有異味
  📌 專家指出，膠盒經常受熱或日照，會破壞塑膠分子，釋出更多有害物。

4. 高油高糖食物改用玻璃器皿
翻熱高油分或高糖分食物（如咖喱、甜酸汁）更易破壞膠料分子，建議改用微波爐適用的玻璃或陶瓷器皿。

5. 外賣膠盒唔好亂叮
外賣膠盒如無標示「可微波加熱」或無製造商說明，應將食物轉放至安全器皿再加熱。

帶飯唔係唔健康，叮得啱先至安心！翻熱前睇清膠盒標示、物料、狀態，唔好因一時方便而影響長遠健康。

文：Jamie＠ECjobsonline 編輯部